Qoǵam • 15 Qańtar, 2020

Hat qorjyn (15.01.2020)

2211 retkórsetildi

..muńyn shaǵady

Aýyz sýǵa jarymaı otyrmyz

Esil aýdanyndaǵy Novoýzenka aýyly kóp jyldan beri sapaly tirshilik náriniń zaryn tartyp keledi. Ana bir jyldary turǵyndardy taza aýyz sýmen qamtý úshin 7 mıllıon teńgeniń sý qondyrǵysy ornatylǵan edi. Biraq jıi isten shyǵyp, aqyry jumysyn toqtatty. Sodan beri sapaly sýǵa zárýmiz. 18 shaqyrym jerdegi Korneevka aýylynan tasýǵa májbúrmiz. Oǵan qoly jetpegenderi amal joqtyǵynan eski qudyqtyń sýyn paıdalanady.

 Áli kúnge deıin sheshimin tappaı kele jatqan másele aýyldyq okrýg ákiminiń esep berý kezdesýlerinde talaı ret aıtylǵanymen, sóz júzinde qalyp keledi. Quzyrly organdar aralasqannan keıin isten shyqqan qondyrǵy qaıta qalpyna keltirilgenimen, qýanyshymyz uzaqqa sozylmady. «Qamqor Esil» JShS-niń ókilderi ornatqan súzgi taǵy jaramsyz bolyp qaldy. Seriktestik basshylyǵymen habarlas­qanymyzda «erteń aýystyramyz» degen qurǵaq ýádemen shyǵaryp salady. Jaz, kúz ótip, mine qylyshyn súıretip qys kelse de aýyl turǵyndarynyń jaǵdaıy eshkimdi tolǵandyrar emes. Kórshi aýyldardan sý tasyp júrgen janaıqaıymyzdy estir qulaq tabylar ma eken?

 Bul kóptegen eldi mekenge tán kórinis. Taýaǵashtyqtar da taza aýyz sýǵa jarymaı otyr. Ábden tozyǵy jetken fıltrler men sorǵy jıi isten shyǵatyndyqtan tazalanbaǵan sý ishýge májbúr. Sapasyz sý tutynǵandyqtan qandaı dertke shaldyǵyp jatqanymyzdy ózimiz de bilmeımiz.

 

Alma NURYShEVA

 

Soltústik Qazaqstan oblysy,

Esil aýdany

 

...ótinish aıtady

Jumataı áýlıe zerttelse deımiz

Bizdiń Úmitker aýyly – Pavlodar oblysy, Baıanaýyl aýdanyndaǵy Qanysh jáne Musa Shorman aýyldarymen shekaralas ornalasqan. Bıyl Musa Shorman aýylynda osy jerdiń týmasy Jumataı áýlıege (Ábjalap) Quran oqylyp, as berildi.

Ábjalap áýlıe tirshiliginde dúnıege moıyn burmaǵan jan. Jańbyrdyń jaýatyn kúnin, qysta aıaz ben boran bolatyn kúnderdi dál aıtyp beredi eken. Qazaq baılaryn konfıskasııalaýdy da buryn boljap: «Maldaryńnan aıyrylasyńdar, bárin satyńdar nemese bólip berińder», depti. Birde áýlıeniń túıelerdi qushaqtap: «Túıeni soıyp, temir miner zaman keler» dep keıigen kezderi de bolypty. Ábjalap áýlıe Beısenbaıuly qaqaǵan aıazda da, jazdyń aptap ystyǵynda da bir qabat kıimmen, jalań aıaq, jalań bas júre beredi eken.

El ishinde Jumataı áýlıe týraly urpaqtan-urpaqqa jetip, aıtylyp júrgen adam sengisiz qasıetteri kóptep saqtalǵan. Qazirgi kezde Ábjalap áýlıe zıratyna táý etip, zııarat etýshiler kóptep kezdesedi. Aýyrǵan adamdar basyna túnep, dertine shıpa izdep, saýyǵyp qaıtqandar da bolǵan.

Ábjalap áýlıeni Máshhúr Júsip Kópeev óte qurmettegen.

Áýlıe týraly aqparat quraldarynan eshbir habarlardy oqymadyq. Elbasy N.Nazarbaevtyń «Rýhanı jańǵyrý» baǵdarlamasynda aıtylǵandaı, uly babalardy, úlken tulǵalardy ulyqtaý, ardaqtaý, olardyń esimderin keler urpaqqa jetkizý búgingi jáne keler urpaqqa asa qajet deımiz. Sondyqtan osy máselege qatysty mınıstrlikter, tarıhshylar arnaıy zertteýler júrgizýi kerek shyǵar. Onyń zırat basy temir sharbaqpen ǵana qorshalǵan, kesene nemese áýlıe atyna saı kórnekti zırat salynsa degen ótinishimizdi Baıanaýyl aýdanynyń ákimdigi men aýdandyq máslıhatyna qulaqqaǵys etemiz.

 

Jeńis ShADETOV

 

Qaraǵandy oblysy,

Buqar jyraý aýdany,

Úmitker aýyly

 

...jańalyǵyn jetkizedi

Ardagerler bólmesi ashyldy

Kóktemde aýdanymyzǵa ákim bolyp taǵaıyndalǵan D.Orazbaev mamyr aıynda Mamyrsý aýylynyń turǵyndarymen kezdeskende: «Aýyldaryńyzda ardagerler bas qosyp otyratyn bólme bar ma?» degen saýal qoıdy. Ondaı bólme bizde joq bolatyn. Eki kúnnen keıin aýdan ákiminiń ókimimen aýyl ákimshiligi ǵımaraty ishinen bizge úlken bólme berilip, ony jabdyqtaý jumystaryn bastap kettik. Bólmege Mamyrsý aýylynyń irgetasyn qalaǵan, asharshylyqty da, soǵysty da kórgen, tylda da aıanbaı eńbek etken ardagerlerdiń sýretterin qoısaq degen sheshimge keldik. Sol kúnnen bastap aýylymyzdyń ardagerleriniń sýretterin jınaqtaı bastadyq. Osy jumystyń ózine jeti aıdaı ýaqyt ketti. Sodan ne kerek, 25 qarashada ardagerler bólmesi saltanatty túrde ashyldy. Bólmeni ózimizshe úsh bólimge bólip, aýylymyzdyń ekinshi dúnıejúzilik soǵysqa qatysqan jáne Aýǵan soǵysyna baryp, oralmaǵan azamattardyń, sovhoz kezinde eńbegimen el qurmetine bólengen aǵa býyn ókilderiniń, sovhoz, mektep basqarǵan jandardyń, Batyr ana, Altyn alqa, Kúmis alqa ıegerleri atanǵan ardaqty analardyń sýretterin ildik. Osy rette ardagerler bólmesiniń ashylýyna muryndyq bolǵan aýdan ákimine, osy istiń basy-qasynda júrgen aýyl ákimi A.Ibraıshınge, qol ushyn bergen aýyl azamattaryna alǵysymyz sheksiz.

 

Orynbek TURYSBEKULY,

Mamyrsý aýyldyq ardagerler keńesiniń tóraǵasy

 

Shyǵys Qazaqstan oblysy,

Aıagóz aýdany

 

...alǵys aıtady

Shıpager shapaǵaty

 Men «Egemen Qazaqstan» gazetiniń elý jyldan bergi oqyrmanymyn.

 Byltyr elordadaǵy №2 qalalyq aýrýhanasyna jedel túrde es-tússiz tústim. Osyndaǵy bar jiger-qabiletin, bilimin aıamaıtyn aq jeleńdi azamattarymyzdyń arqasynda otadan keıin jaǵdaıym jaqsardy.

 О́mirge qaıta ákelgen Ulttyq ǵylymı Onkologııa ortalyǵynyń kardıologııa bóliminiń meńgerýshisi Talǵat Qarkenulyna, qalalyq aýrýhanada ota jasaǵan bólim meńgerýshisi Alekseı Smolenskııge, kardıohırýrg Islam Qalymhanulyna, kardıoreanımatolog Sábıt Qaldybaıulyna, kezekshi dáriger Berik myrzaǵa sheksiz alǵysymdy bildiremin.

 Shıpagerlerge aıtarym – alaqandaryńyz jumsaq bolyp, qoldaryńyzǵa Alla dert bermesin, zor densaýlyq, januıalyq baqyt tileımin.

Nesibeldi ORAL

Nur-Sultan

 

Sońǵy jańalyqtar

Nur-Sultanda qar kúni atap ótiledi

Qoǵam • Búgin, 10:12

18 qańtarǵa arnalǵan aýa-raıy boljamy

Qazaqstan • Búgin, 09:58

Almaty jasyl qalaǵa aınalady

Ekologııa • Keshe

Bulandydaǵy berekeli is

Aımaqtar • Keshe

Mal baqqanǵa bitedi...

Aımaqtar • Keshe

Tekeli – eńbekshiler mekeni

Aımaqtar • Keshe

Jer ıesin tapsa ıgi

Aımaqtar • Keshe

Ǵasyrlarǵa ulasar uly tuǵyr

Rýhanııat • Keshe

«Ádilet, shapqat kimde bar...»

Rýhanııat • Keshe

Uqsas jańalyqtar