Aqtóbe qalasynda jol polıseıleri 20 jasar qyzdy tonap, zorlap ketken eki kúdiktini oqıǵa bolǵan boıda tap bastyrmaı ustady. Bul týraly «Aktobe-taıms» gazeti habarlady.
Oqıǵa qalanyń eski bóliginde, tań aldynda, saǵat 4-tiń shamasynda oryn alǵan. Osy ýaqytta qorlyqqa ushyraǵan boıjetken 102-ge qońyraý shalǵan. Ol ózin budan 5 mınýt buryn belgisiz eki jigittiń Áıteke bı kóshesi, 46-úıdiń aýlasynda tonap, zorlap ketkenin málimdeıdi. Qyz olardyń túr-tústerin aıtyp berdi. Zorlyqshylar jábir kórýshiniń 5 myń teńgesi men qujattaryn alyp ketipti.
Qyz sýrettegen keskinder boıynsha iz kesýge shyqqan polıseıler kóp uzamaı kúdiktilerdi qolǵa túsirdi. Ekeýi de Batys Qazaqstan oblysynan kelgender eken. Zorlyqshylardyń biriniń jasy – 22-de, ekinshisi 30-da bolyp shyqty.
Murat Aıtqoja.
