Ońtaılandyrý maqsatyn túsindirý baǵytynda aýdan ákimdigi Rozovka, Efremovka, Mıchýrın atyndaǵy, Shaqat aýyldarynda jergilikti turǵyndarymen kezdesip jıyndar ótkizýde.
Iаǵnı, tıimdi ońtaılandyrý barysynda aýyldardyń damýy 2025 jylǵa deıingi «О́ńirlerdi damytý» baǵdarlamasyna saı júrgiziledi. Baǵdarlama memlekettik, áleýmettik qyzmettermen qamtylǵan jańa zaman aýyldaryn qalyptastyrýǵa múmkindik beredi.
Al 140 turǵyn qalǵan 37 úıden turatyn Zaozernoe shaǵyn aýylynda eshbir áleýmettik nysan joq eken. Kireberis jol jóndelmek. Eki aralyqqa oqýshylar mektep avtobýsymen barýda.
– Shaǵyn aýyldy qaǵaz júzinde taratyp, Shaqat aýylynyń quramyna qosý tıimdi. Zaozernoe Shaqat aýyly quramyna ense, 800 turǵyny bar qos aýylǵa bólinetin qarajattyń ıgiligin kórer edik, – deıdi aýyl ákimi Bazarbaı Ábıev.
Gosplemstansa bólimshesi de Mıchýrın atyndaǵy aýylǵa qosylyp, turǵyndar sany 2 jarym myńǵa jetpekshi.
Al bıyl elimizde halyq sanaǵynyń ótetini belgili. Aýyldar sanynyń retke kelýi de, aýdandaǵy Grıgorevka, Olgınka, Lýgansk, Chernoresk, Rojdestvenka sııaqty aýyldyq aýmaq ataýlarynyń da aty-jónderi endi eldik múddege saı ózgergeni qajet-aq.
Bul kúnderi óńirdegi aýdandarǵa oralmandar, ońtústikten qonys aýdarýshylar kóship kelýde.
Pavlodar oblysy,
Pavlodar aýdany
