Qazirgi kezde otandyq bylǵary qolǵap sheberleri Qytaıda ótetin lısenzııalyq týrnırge qyzý daıarlanýda. Aıtýly jarysta sary qurlyqtyń barlyq myqtylary bas qosyp, Olımpııa oıyndarynyń joldamalary úshin talasady. Sol sebepti de Vasılıı Levıt, Bekzat Nurdáýletov, Qamshybek Qońqabaev, Ábilhan Amanqul, Abylaıhan Júsipov, Tursynbaı Qulahmet, Sáken Bıbosynov jáne taǵy basqa elimizdiń eń úzdik boksshylary Alataý baýraıynda 12 kún boıy jattyqty.
Osy jıynǵa sonaý Bostandyq aralynan dańqy jer jarǵan Hýlıo Sezar La Krýz, Arlen Lopes, Endı Krýz Gomes, Ronıel Iglesıas Satalongo, Lazaro Alvares Estrada bastaǵan bir top gúrzi judyryqty jigitter keldi. Sondaı-aq, Japonııa men Vengrııanyń ulttyq quramalary da osy jerde ter tókti.
Ǵalymjan Kenjebaev tizginin ustaǵan komanda kelesi oqý-jattyǵý jıynyn Nur-Sultanda ótkizedi. Taıaý kúnderi olardyń qataryna Anglııa men Germanııanyń boksshylary qosylady dep kútilýde.
