Qoǵam • 21 Qańtar, 2020

B. Saparbaev elordadaǵy psıhıatrııalyq ortalyqtyń jumysymen tanysty

10 retkórsetildi

Premer-Mınıstrdiń orynbasary Berdibek Saparbaev Nur-Sultan qalasyndaǵy Medısınalyq psıhıatrııalyq densaýlyq ortalyǵynyń jumysymen tanysty. Bul týraly primeminister.kz habarlady. 

Medısınalyq mekemede psıhıkalyq aýytqýshylyqtary bar adamdarǵa jáne múgedek jandarǵa densaýlyǵyn qalpyna keltirip, qoǵamǵa oralýyna kómek kórsetiledi. Osy maqsatta eńbek arqyly ońaltý kýrstary uıymdastyrylǵan, onda pasıentter jumysshy mamandyqtaryn ıgere alady. Jyl saıyn 500-den asa adam ońaltý emsharasynan ótedi.

«Biz sondaı-aq áleýmettik beıimdelýge kómektesemiz, konsýltasııalar, áleýmettik daǵdylar trenıngterin ótkizemiz, psıhologııalyq bilim, otbasylyq keńes berýmen aınalysamyz. Kómekti bilikti mamandar kórsetedi. Osylaısha, biz ońaltýdyń keshendi máselelerin sheshemiz»,- dep atap ótti ortalyq dırektory Erbol Nurqatov.

2015 jyldan bastap atalǵan medısınalyq ortalyqtyń bazasynda «GreenTAL» áleýmettik sheberhanasy tabysty jumys istep keledi, onda áleýmettik jaǵynan álsiz sanattaǵy azamattardy: múgedektigi bar adamdardy, kóp balaly jáne az qamtylǵan otbasylardan shyqqan azamattardy, burynǵy sottalǵandardy oqytady jáne odan ári jumysqa ornalastyrady. Munda medısınalyq ortalyqta ońaltýdan ótken pasıentter de jumys taba alady.

Joba jetekshisi Emın Askerovtyń aıtýynsha, bes jyl ishinde sheberhanada 700-den astam adam oqytyldy. Ortasha jalaqy 100-150 myń teńgeni quraıdy.

«Bizdiń negizgi maqsatymyz – aqsha tabý emes, áleýmettik turǵydan álsiz azamattardy jumysqa ornalastyrý úshin jaǵdaı jasaý. Búgingi tańda bizdiń sheberhanada 42 adam jumys isteıdi, olardyń 16-y – densaýlyǵynda mentaldyq kemshiligi bar azamattar. Degenmen, ózderiniń erekshelikterine qaramastan, olar eńbek etip, jalaqy alady, olardyń ómir súrýge jáne jumys isteýge degen yntasy joǵary»,- dedi E. Askerov.

Berdibek Saparbaev áleýmettik sheberhananyń jumysyn joǵary baǵalap, Eńbek jáne halyqty áleýmettik qorǵaý mınıstrligine osyndaı tájirıbeni elimizdiń basqa da óńirlerinde taratý máselesin qarastyrýdy tapsyrdy.

Aralanǵan kelesi nysan «DAYR» qoǵamdyq qory boldy, ony I-top múgedegi Ámir Súleımenov ashqan. Bir jylǵa jeter-jetpes ýaqytta qorda jumyssyzdar, múgedektigi bar azamattar, tolyq emes jáne kóp balaly otbasylar qatarynan 200-den astam adam AT jáne SMM daǵdylaryna oqytýdan ótti. Olardyń 80%-y jumysqa ornalasty.

«Sizder kópshilikke úlgi bolarlyq ispen aınalysyp júrsizder. О́ıtkeni, ómirlik qıyndyqtarǵa qaramastan, sizder ózderińizben tulǵalyq jumys istep qana qoımaı, ózderińizdi jan-jaqty damytyp, óz qabiletterińizdi arttyryp júrsizder, sonymen qatar basqa adamdarǵa belgili bir daǵdylardy ıgerýge jáne jumysqa ornalasýǵa kómektesip júrsizder. Eńbek jáne halyqty áleýmettik qorǵaý mınıstrligi men ákimdik osyndaı jobalardy qoldap, taratýy kerek»,- dep atap ótti B. Saparbaev.

Sonymen qatar, vıse-premer iri saýda jelisiniń gıpermarketine bardy. Elorda ákimdigi saýda kompanııasymen birlese otyryp, turmysy tómen otbasylardan shyqqan balalardy kepildik berilgen áleýmettik pakettermen qamtamasyz etý jobasyn júzege asyrýdy josparlap otyr.

«AÁK alatyn otbasylarǵa plastıkalyq kartalar beriletin bolady. Olardyń kómegimen azyq-túlik ónimderi men gıgıenalyq jıyntyqtardy tikeleı dúkenderden alýǵa bolady. Bıyl ataýly áleýmettik kómekpen jáne áleýmettik pakettermen 4 200-ge jýyq az qamtylǵan otbasylardy qamtýdy josparlap otyrmyz. Atalǵan maqsatqa 2 mlrd teńgeden astam qarjy bólindi», — dedi qala ákiminiń orynbasary Baqtııar Máken.

Jobany osy jyldyń naýryz aıynda iske qosý josparlanýda.

Sońǵy jańalyqtar

Abaı murasyna arnalǵan kórme

Rýhanııat • Keshe

Jaǵa ustatqan jat qylyq

Aımaqtar • Keshe

Uqsas jańalyqtar