Sport • 21 Qańtar, 2020

Qaraǵandyda ústel tennısinen el chempıonaty ótti

52 retkórsetildi

Arqa tósinde alty kún boıy ústel tennısinen alaman jarys – Qazaqstannyń chempıonaty ótti. Elimizdiń barlyq oblystarynan jáne respýblıkalyq mańyzdaǵy qalalarynan kelgen 160 tennısshi jarys júldelerin sarapqa saldy.

Kishi raketkany qolǵa alǵandar týrnır baǵdarlamasynyń jeti túri boıynsha kúsh synasqan bolatyn. Atap aıtqanda, erler jáne áıelder komandalary óz taraptary boıynsha myqtyny anyqtasa, jigitter men qyzdar jekeleı synda ózara saıysty. Sonan soń, tennısshiler juptar jáne aralas juptar arasynda chempıonat júldeleri úshin talasty.

Jarystyń bas tóreshisi Tatıana Kım árbir oıynnyń asa tartysty ótkenin atap ótti. «Chempıonat barysynda el quramasynyń sapynda júrgen sheberler ózderiniń myqtylyǵyn dáleldep shyqty», deıdi maman. Atap aıtqanda, Qazaqstannyń jeti dúrkin chempıony Kırıll Gerasımenko bul joly da jolyndaǵysyn qoǵadaı japyryp, jeńis tuǵyrynyń eń bıik satysyna kóerildi. Almatylyq tennısshi fınaldyq synda Batys Qazaqstan oblysynyń myqtysy Aıdos Kenjeǵulovtan basym tústi.

Budan bólek, Kırıll Gerasımenko juptasyp óner kórsetý saıysynda elordalyq tennısshi Aleksandr Gerasımenkomen tize biriktirip, jarys jeńimpazy atandy.

Al áıelder arasyndaǵy tartysty synda qaraǵandylyq qyz Záýresh Aqashevanyń aıy ońynan týyp, top jardy. Chempıonattyń altynyna talasqan sheshýshi saıysta ol elordalyq tennısshi Anastasııa Lavrovany tize búktirdi. Sondaı-aq, bolashaǵy zor Záýresh tennısshi shymkenttik Sarvınoz Mırkadırovamen juptasyp óner kórsetip, chempıonattyń taǵy bir altyn medalin moıynyna ildi. Ol ol ma, qaraǵandylyq daryndy jas aralas juptasyp óner kórsetý saıysynda da tamasha tabysqa qol jetkizip, jerlesi Vladıslav Zaharovpen birge el chempıony atandy.

Sonymen, chempıonattyń absolıýtti jeńimpazy atanǵan Záýresh Aqasheva aldaǵy ýaqytta ústel tennısinen ótetin Azııa kýbogy jolyndaǵy saıysta  baq synaýǵa múmkindik beretin joldamany jeńip aldy. Bizdiń tennısshi qyzymyz qatysqaly otyrǵan bul dúbirli dodada qurylyqtyń eń úzdik degen 16 tennısshisi óner kórsetetin bolady. Záýreshpen birge atalǵan jarysta Kırıll Gerasımenko da kúsh synaıdy.

Ústel tennısinen sport sheberi, Ulttyq qurama komandanyń múshesi Záýresh Aqashevanyń atalǵan sport túrimen aınalysqanyna 12 jyl bolypty. Keıingi jeti jylda talantty tennısshi Qaraǵandy oblysynyń aǵa bapkeri Elmıra Álıevanyń qaramaǵynda jattyǵyp júr eken.

«Meniń tabysqa jetýime psıhologııadyq ázirlik kóp kómegin tıgizedi. Kóbine men jalǵyz qalyp, oıǵa shomǵandy unatamyn. Júıkeni ábden tynyqtyryp alǵan soń, aldaǵy oıyndardyń taktıkalyq tásilderin  oısha qurastyrǵandy unatamyn», deıdi Qazaqstannyń sý jańa chempıony.

Aıtpaqshy, Záýresh úshin bul chempıonat eresekter arasyndaǵy tuńǵysh týrnır boldy. Budan buryn jasóspirimder arasynda Qazaqstannyń eki dúrkin chempıony atanǵan daryndy sportshy úlkender arasyndaǵy dodaǵa taısalmaı túsip, elimizdiń eń myqty jáne tájirıbeli tennısshilerin dalada qaldyrdy.

Chempıonat qorytyndysy boıynsha qyzdar arasyndaǵy komandalyq synda Batys Qazaqstan oblysynyń tennısshileri bárinen basym tústi. Almatylyq sheberler kúmis júldeger atansa, elorda men Qaraǵandy oblysynyń ujymdary qola júldeni qanaǵat etti.

Al erler  arasyndaǵy komandalyq saıysta Nur-Sultan qalasynyń ujymy úzdik shyqty. Shymkenttiń sheberleri júldeli ekinshi orynnan kórinse, Almaty qalasy men Qaraǵandy oblysynyń tennısshileri úshinshi orynǵa taban tiredi.

Jalpy, Qaraǵandyda ótken Qazaqstan chempıonaty týrnıriniń joǵary deńgeıde uıymdastyrylǵanyn aıta ketken lázim. Jarystyń ashylý saltanatyna oblys ákimi Jeńis Qasymbektiń arnaıy qatysyp, sportshylarǵa quttyqtaý sóz arnaǵanynyń ózi bul sport túriniń Arqa óńirinde qurmettiń tórinde ekenin ańǵartsa kerek.

Chempıonattyń marapattaý rásiminde jeńimpaz jáne júldeger tennısshilerge oblys ákimi atynan aqshalaı sertıfıkattar tabys etildi.

 

 

Qaraǵandy oblysy

Sońǵy jańalyqtar

Kitaphana kóbeıgen elde qylmys azaıady

Ádebıet • Búgin, 15:14

Zańsyz qarý-jaraq satqandar sottaldy

Qoǵam • Búgin, 12:50

Igerilgen ınvestısııanyń ıgiligi

Aımaqtar • Búgin, 12:37

Taraz: Bilim oshaǵyndaǵy zańsyzdyqtar

Aımaqtar • Búgin, 11:20

Abaıdyń dombyrasy qandaı bolǵan?

Abaı • Búgin, 11:09

Halyqaralyq jıynǵa qatysty

Saıasat • Búgin, 08:15

Jańa kodeks jobasyn talqylady

Saıasat • Búgin, 08:12

Shetelge shyqpaýǵa keńes berdi

Qoǵam • Búgin, 08:04

Saýdakenttiń sharýalary saqadaı saı

Ekonomıka • Búgin, 08:02

«Qarjy pıramıdalary» qaıtyp keldi me?

Ekonomıka • Búgin, 08:01

Depýtattar on bir usynys ázirledi

Parlament • Búgin, 07:56

Uqsas jańalyqtar