Alaıda, nege ekeni belgisiz, jańaǵy aıtqan tehnıkalardyń tópelep qar jaýsa, boran soqsa boldy, jetispeıtindigi belgili bolady da shyǵady. Bul oqıǵa bıyl da aınymaı qaıtalandy. Jaǵdaıdyń osylaısha qalyptasqanyna narazy bolǵan jurt qazirgi ýaqytta áleýmettik jelide atqarýshy bılikti aıamaı synap jatyr.
Jýyrda bolǵan alaı-túleı boran kósheler men joldardy jaýyp tastady da, bul saladaǵy kemshilikterdiń betin ashty. Muny oblys ákimi Jeńis Qasymbektiń ózi de moıyndady.
– Sońǵy soqqan boran biraz máseleniń betin ashty: tehnıkanyń jetkiliksiz ekenin kórsetti. Respýblıkalyq mańyzdaǵy joldar boıynsha, ásirese Qaraǵandy – Temirtaý ýchaskesindegi jaǵdaıǵa baılanysty shaǵymdar óte kóp. Pavlodar baǵytynda da solaı. Balqashqa baratyn joldy jabýǵa týra keldi. Oblys ortalyǵy boıynsha da shaǵymdar jetkilikti. Negizi, bul saladaǵy qyzmettiń jumys isteıtinin kórip otyrmyz. Biraq turǵyndar tarapynan shaǵymdar ústi-ústine túsýde: qar joldyń shetine úıile salady, jaıaý júrginshiler joldary tazartylmaıdy. Sol sebepti adamdar jol boıymen júredi de, osydan kelip apattyq jaǵdaılar týyndaıdy, – dedi ol apparat jıynynda.
Kósheleri men joldary qalyń qardyń qushaǵynda qalǵan Qaraǵandyda qar tazalaý jumystarymen alty kompanııa aınalysady eken. Olardyń tórteýi merdigerlik bolsa, qalǵany – kommýnaldyq kásiporyndar. Keshegi kúni qar tazalaýǵa 200-ge jýyq tehnıka jumyldyrylǵan. Búginde munyń ózi azdyq etip otyr. Oblys ortalyǵynyń basty dańǵyldary tazalanǵanymen, shetkerirek kósheler men jeke menshik úıler ornalasqan sektorlardaǵy qardy syrtqa shyǵarý isinde olqylyq bar. Ásirese jeke sektorlardaǵy jaǵdaı alańdatady. Mundaǵy taý-taý bolyp úıilip qalǵan qardy qazir syrtqa shyǵarmasa, kóktemde jaǵdaı tipti ýshyǵyp ketýi múmkin. Bútindeı shaǵyn aýdandardy qarǵyn sý alý qaýpi bar. Iаǵnı, bul atalǵan máselelerdiń túıini qosymsha tehnıka kúshin alǵanda ǵana sheshiledi degen pikir aıtady qala basshylyǵy.
Kenshiler astanasyndaǵy jaǵdaı osylaı bolǵanda, oblystyń ózge qalalary men aýdan ortalyqtaryndaǵy jáne aýyldardaǵy jaǵdaı qandaı deseńizshi?!
Al sınoptıkterdiń boljaýynsha, Qaraǵandy oblysy boıynsha naýryz aıyna deıin boran men burqasyn mol bolatyn kórinedi.
Qaraǵandy oblysy
