«3-14 aqpan aralyǵynda bokstan Azııa/Okeanııa aımaqtyq irikteý týrnıri Qytaıdyń Ýhan qalasynda ótýi tıis bolatyn. Atalǵan týrnırde erler men áıelderdi qosa eseptegende Tokıo Olımpıadasynyń 63 lısenzııasy sarapqa salynady dep kútilgen.
Búgin tańerteń akkredıtasııadan ótken medıa ókilderine arnalǵan hatta (onyń ishinde Olympic.kz redaksııasynyń jýrnalısteri de bar) irikteý týrnıriniń belgisiz ýaqytqa aýystyrylǵany aıtylǵan. Uıymdastyrý komıtetiniń málemdeýinshe, ári qaraıǵy aqparatty Halyqaralyq Olımpıada komıteti taratady.
«Ýhan qalasynda pnevmonııanyń asqynýyna sebep bolǵan koronavırýstyń taralýyna baılanysty, adamdardyń densaýlyǵyna nuqsan keltirmeý maqsatynda jergilikti uıymdastyrý komıteti týrnırdi keıinge qaldyrýdy jón kórdi» delingen hatta.
Aıta ketelik, 2020 jylǵy Tokıo Olımpıadasyna irikteý týrnıri jańa ereje boıynsha ótkiziledi. Jańa erejege sáıkes, boksshylar tórtjyldyq dodasyna joldama alý úshin qurlyqtyq irikteý syndarynda baq synaý qajet. 2020 jyldyń aqpany men mamyry aralyǵynda bokstan qurlyqtyq jáne álemdik irikteý týrnırleri uıymdastyrylady. Afrıkadaǵy báseke 2020 jyldyń 20-29 aqpany aralyǵynda Dakarda (Senegal), Eýropadaǵy irikteý syny 13-23 naýryz kúnderi Londonda (Ulybrıtanııa) ótedi. Amerıkalyqtar 23 naýryz ben 3 sáýir aralyǵynda Býenos-Aıreste (Argentına) joldamaǵa talasady. Al álemdik irikteý týrnıri mamyr aıynda Fransııanyń Parıj qalasynda uıymdastyrylady» delingen habarlamada.
