Eger biz qazirgi zamandy adamzat tarıhyndaǵy jańa bir kezeń dep qarastyrsaq, árıne memleketimizdi jańa belesterge jetkize alatyn, jańasha oılanatyn jastardy memlekettik qyzmetke tartý qajettigi týyndaıdy.
Sondyqtan Prezıdenttik jastar kadr rezervi baǵdarlamasynyń eń basty artyqshylyǵy – Qazaqstandaǵy memlekettik qyzmetti utymdy transformasııalaý. Iаǵnı, memlekettik qyzmet qazirgi zamannyń syn-tegeýrinderdi eskerip, ınnovasııalyq amaldardy qoldana otyryp, elimizdi álemniń aldyńǵy qatarly memleketteri qataryna enýin júzege asyrýy qajet. Osy turǵydan alǵanda, elimizdegi alǵyr jastardyń basyn biriktirý – bıik maqsatqa jetý jolyndaǵy alǵashqy baspaldaq.
Irikteý prosesi kúrdeli bolǵanyna qaramastan, qyzyqty ótti dep oılaımyn. Alǵashqy eki kezeń sıfrly jáne verbaldyq testilerden quralǵan. Ondaǵy basty maqsat – adamdaryń qysqa ýaqyt ishinde tapsyrmany túsinip, berilgen sıfrly jáne basqa aqparatty taldaı alýyn anyqtaý. Úshinshi kezeń úsh negizgi elementten turdy: jobany tanystyrý, esse jazý jáne áleýetti baǵalaý. Meniń jobamda Qazaqstannyń sý qaýipsizdigi máselelerine arnalǵan sheshimder qarastyrylǵan. Esse jazý barysynda úmitkerlerdiń analıtıkalyq daǵdylary baǵalandy.
Áleýetti baǵalaý bizdiń qanshalyqty komandamen jumys isteı alýymyz, berilgen tapsyrmaǵa sony sheshimder taba alýymyz sııaqty qasıetterimizdi kórsetti. Men úshin eń qyzyq kezeń – eksperttik komıssııamen áńgimelesý. Sol kezeńde men ıdeıalarymmen egjeı-tegjeıli bólisip, sý qaýipsizdigi máselelerin sheshý boıynsha pikirimmen bólisýge múmkindik aldym.
Prezıdenttik jastar kadr rezervi baǵdarlamasy Memleket basshysynyń bizge artqan senimi dep bilemin. Men úshin mundaı senim – óte joǵary jaýapkershilik. Sol sebepti, alǵan bilimimdi el ıgiligine jaratyp, óz paıdamdy tıgize ákele alamyn degen úmittemin. Elimizdiń ekologııasyn jaqsartýǵa óz úlesimdi qosa alatynyma senemin.
Zýlfııa SÚLEIMENOVA,
Prezıdenttik jastar kadr rezerviniń múshesi
