Úkimet • 24 Qańtar, 2020

Úkimet 2020 jylǵa jańa mindetter qoıdy

143 retkórsetildi

Prezıdent Qasym-Jomart Toqaevtyń tóraǵalyǵymen ótken Úkimettiń keńeıtilgen otyrysynda Premer-Mınıstr Asqar Mamın elimizdiń 2019 jylǵy áleýmettik-ekonomıkalyq damý qorytyndylary men osy jylǵa arnalǵan mindetter týraly baıandady. Bul týraly Premer-Mınıstrdiń baspasóz qyzmeti habarlady.

Premer-Mınıstr 2019 jyly Úkimet Elbasy Nursultan Nazarbaevtyń strategııalyq baǵytyn, bes ınstıtýsıonaldyq reformany júzege asyrý boıynsha «100 naqty qadam» Ult josparyn, «Nur Otan» partııasynyń 28 sezinde belgilegen mindetterdi oryndaýǵa jáne Prezıdent Qasym-Jomart Toqaevtyń saılaýaldy baǵdarlamasy men Qazaqstan halqyna arnaǵan Joldaýyndaǵy mindetterdi iske asyrýǵa baǵyttalǵan jumysty atqarǵanyn atap ótti.

2019 jyldyń qorytyndysy boıynsha halyqtyń naqty tabysy 5,5%-ǵa ósti, JIО́ ósimi 4,5%-dy qurady. О́simniń 85%-dan astamyn shıkizattyq emes salalar qamtamasyz etti. Negizgi draıverler qurylys – 12,9%, saýda – 7,6%, kólik – 5,1% jáne ónerkásip – 3,8% boldy. О́ńdeý ónerkásibinde ósim 4,4%-dy qurady, ol avtomobıl jasaý (63%), mashınalar men jabdyqtar óndirisi (22%), farmasevtıka (12%), jeńil ónerkásip (14%) jáne sýsyndar óndirisi (10%) esebinen qamtamasyz etilgen. Taý-ken óndirý ónerkásibi metall kenderin óndirý kóleminiń 16%-ǵa ulǵaıýynyń nátıjesinde 3,7%-ǵa ósti.

Negizgi kapıtalǵa salynǵan ınvestısııalar 8,5%-ǵa, onyń ishinde jeke ınvestısııalar 9,5%-ǵa ósti. Inflıasııa josparly 4-6% sheginde, ıaǵnı 5,4% deńgeıinde (2018 jyly – 5,3%).

Halyqtyń naqty tabysy 5,5%-ǵa ósti. 2019 jyly 2,7 mln azamattyń jalaqysy kóbeıtildi, onyń ishinde bıznes arasynda keń qoldaý alǵan, eń tómengi jalaqyny arttyrý sharalary esebinen (42,5 myń teńgege deıin 1,5 ese) ósti. Eńbek naryǵynda turaqtylyq saqtalýda. Jumyssyzdyq deńgeıi 4,8% qurady. 423 myńnan astam jańa jumys orny quryldy, onyń ishinde 279 myńy – turaqty.

Transfertterdi qospaǵanda, memlekettik bıýdjet kiristeri 9 trln 688 mlrd teńgege (jospardyń 101,2%) oryndaldy, bul 2018 jylǵy kórsetkishten 1,5 trln teńgege artyq. Syrtqy saýda aınalymy $97 mlrd deıin ósti, onyń ishinde eksport – $60 mlrd, ımport – $37 mlrd qurady.

2019 jyly shamamen $25 mlrd tikeleı sheteldik ınvestısııa tartyldy. Ekonomıkadaǵy ShOB úlesi 29,5%-ǵa jetti. Jumys istep turǵan kásiporyndar sany 8%-ǵa ósti. Osy jyldyń 1 qańtaryndaǵy jaǵdaı boıynsha Jekeshelendirýdiń keshendi jospary 93%-ǵa oryndaldy.

«Nurly jol», «Nurly jer» jáne óńirlerdi damytý memlekettik baǵdarlamalaryn iske asyrý 13 mln-nan astam sharshy metr turǵyn úı salýǵa, 4,4 myń shaqyrymnan astam respýblıkalyq joldy salýǵa jáne rekonstrýksııalaýǵa, 640 shaqyrymnan astam joldy paıdalanýǵa berýge múmkindik berdi. «Aýyl – El besigi» jobasy aıasynda 53 aýylda 452 joba iske asyryldy.

«Investısııa úshin jahandyq básekelestikti kúsheıtý jaǵdaıynda Úkimet el ekonomıkasyna ınvestısııalardyń jańa tolqynyn tartýǵa basa nazar aýdarady. Bizdiń strategııalyq mindetimiz – negizgi kapıtalǵa salynatyn ınvestısııalardyń kólemin jyl saıyn orta eseppen 15%-ǵa arttyrý jáne onyń deńgeıin 2025 jylǵa qaraı JIО́-niń 30%-na deıin jetkizý (2019 jyly 18,2%)», — dedi A. Mamın. 

Premer-Mınıstr Úkimet jumysynyń negizgi basymdyǵy halyqtyń naqty tabysy men turmys sapasyn arttyrý ekenin atap ótti.

2020 jyly Úkimet 7 strategııalyq baǵyt boıynsha jumysty jalǵastyrady, atap aıtsaq: ınvestısııalardy tartý, ónimdiligi joǵary jumys oryndaryn qurý, ınfraqurylymdy, eksportqa baǵdarlanǵan ındýstrııalandyrýdy, otyn-energetıkalyq jáne agroónerkásiptik keshenderin damytý, ekonomıkany sıfrlandyrýdy arttyrý.

Investısııalyq qyzmetti jandandyrý úshin Úkimet 44 trln teńge somasyna 2 myńnan astam jobadan turatyn pýl qurdy. Eńbek ónimdiligin bir adamǵa 8,2 mln teńgege deıin arttyrý josparlanýda (2019 j. – bir adamǵa 7,4 mln tg).

2020 jyly 15 mln sharshy metr turǵyn úı salynatyn bolady. 150 myńnan astam otbasy baspanaly bolady. «Aýyl – El besigi» jobasy aıasynda jańa standarttarǵa sáıkes 190 aýylda sapaly ınjenerlik, kóliktik jáne áleýmettik ınfraqurylymdy damytý boıynsha 800-den astam joba júzege asyrylady.

«Sizdiń tapsyrmalaryńyzdy oryndaý maqsatynda, Úkimettiń 2020 jylǵa arnalǵan jumysynyń negizgi maqsaty – ekonomıka ósimin 4,7-5% deńgeıinde qamtamasyz etý», — dedi A. Mamın. 

Premer-Mınıstr 2020 jyly Úkimettiń aldynda 430 myń jańa jumys ornyn qurý, negizgi kapıtalǵa ınvestısııalar kólemin jalpy ishki ónimniń 20% deńgeıine jetkizý; shıkizattyq emes eksportty $18,6 mlrd (+$3 mlrd) deıin jetkizý; halyqtyń naqty tabysyn 6% (+0,5 p.t.) arttyrý, ekonomıkadaǵy ShOB úlesin 30%-ǵa deıin jetkizý mindetteri turǵanyn atap ótti.

«Úkimet jumysynyń basymdyqty baǵyty – ekonomıkalyq ósimdi azamattardyń ómir súrý deńgeıiniń naqty artýynyń kórsetkishine aınaldyrý», — dep túıindedi A. Mamın.

Sońǵy jańalyqtar

Beıqamdyqqa jol berilmeýi kerek

Rýhanııat • Keshe

Koronavırýssyz Qostanaı

Aımaqtar • Keshe

Kúrish eksportyna kedergi joq

Aımaqtar • Keshe

Álem únemdele bastady

Álem • Keshe

Uqsas jańalyqtar