Aımaqtar • 27 Qańtar, 2020

BQO-da «Jaıyq qyrany-2020» búrkitshiler saıysy qorytyndylandy

62 retkórsetildi

Batys Qazaqstan oblysynyń Terekti aýdanyna qarasty Saryómir aýylynda eki kúnge sozylǵan «Jaıyq qyrany-2020» respýblıkalyq búrkitshiler saıysy márege jetti.

Elimizdiń 8 óńirinen – Almaty, Aqmola, Atyraý, Batys Qazaqstan, Jambyl, Mańǵystaý, Pavlodar oblystarynan jáne Nur-Sultan qalasynyń atynan baıqaýǵa qatysqan qusbegiler saıysqa 14 búrkit, 8 qarjyǵa jáne 8 ıtelgi alyp kelgen eken. Qusbegilerdiń kıim úlgisinen bastap qyrandardyń baby, ıesin qapysyz tyńdaýy, tapsyrmalardy múltiksiz oryndaýy synǵa tústi.

Búrkitshiler saıysynda Nur-Sultan qalasynan kelgen Serikbek Kúntýǵannyń «Alǵyry» barlyq synda úzdik boldy. Qusty qolǵa shaqyrý, erkin ushyrý, shyrǵaǵa salý, qoıanǵa salý synaqtarynda tańdaı qaqtyrdy. Múmkin bolǵan 50 upaıdy túgel oljalady.

Ekinshi orynǵa Almaty oblysynan kelgen Ǵabıt Tańatovtyń «О́tkiri» shyqty. Mańǵystaýlyq Aıshýaq Taımanovtyń «Aqbalaǵy» qoıanǵa quıylyp túskenimen, shyrǵaǵa salý kezinde sál aǵattyq jibergen. Oǵan júldeli úshinshi oryn buıyrdy.

Qarshyǵa qustar saıysynda Almaty oblysynan kelgen Saǵynysh Baetbaıdyń «Kókjendeti» birinshi oryndy ilip tústi. Nursultandyq Erasyl Serikbekulynyń «Chıpogy» men batysqazaqstandyq Muratbek Baltabekovtyń «Ushqyry» kepterge salý synaǵynda bas júldegermen teń upaı jınaǵanymen, qazylar alqasynyń sheshimimen ekinshi-úshinshi oryndardy ózara bólisti.

Itelgi qustar arasynda ótken synaqta Almaty oblysynan kelgen Qýanysh Isabekovtiń «Juldyzbegi» eń kóp 32 upaı jınady. Ekinshi oryndy Atyraýdan kelgen «Sombalaq» (qus ıesi Arman Qoshqarov) ıelense, úshinshi júlde mańǵystaýlyq Aıshýaq Taımanovtyń «Aqbalaǵyna» buıyrdy. Baıqaǵanyńyzdaı, mańǵystaýlyq qusbegi baptaǵan qyrandar eki saıysta júlde aldy.

«Jaıyq qyrany-2020» qusbegiler saıysy Batys Qazaqstan oblysynyń Terekti aýdanynda ótti. Respýblıkalyq týrnırdiń óz dárejesinde ótýine Terekti aýdany men Saryómir aýyldyq ákimdigi barynsha qoldaý kórsetti. Sonymen birge osy iske alǵashqy kúnnen-aq belsene atsalysyp, uıymdastyrý sharalaryn júrgizgen volonter, belgili ólketanýshy, «TourWestKaz» agenttiginiń jetekshisi Aıbolat Qurymbaevtyń eńbegin erekshe aıtyp ótse bolady. Ol áleýmettik jeli arqyly bastama kóterip, týrnır jeńimpazdaryna arnalǵan júlde qorynyń qarjysyn jınap berdi. 

Sońǵy jańalyqtar

Ystyq tamaq taratty

Qazaqstan • Keshe

Betperde kıgen kóktem

Tanym • Keshe

Uqsas jańalyqtar