Prezıdent • 27 Qańtar, 2020

Memleket basshysy sheıh Muhammed ben Zaıd Ál Nahaıanmen kelissóz júrgizdi

101 retkórsetildi

Qazaqstan Prezıdentin resmı qarsy alý rásimi «Ál-Ýatan» saraıynyń aldynda ótti. Qazaqstannyń Týy kóterilip, eki memlekettiń ulttyq Ánurandary oryndaldy. Bul týraly Aqordanyń baspasóz qyzmeti habarlady.

Qasym-Jomart Toqaev pen sheıh Muhammed Zaıd Ál Nahaıan bir-birine iltıpat bildirgennen keıin Qurmetti qaraýyl rotasyn aralap ótti. Eki eldiń resmı delegasııa músheleri tanystyrylǵannan keıin Memleket  basshysy Qurmetti qonaqtar kitabyna qoltańba qaldyrdy.

Rásim sońynda Qazaqstan Prezıdenti men Abý Dabıdiń taq murageri kelissóz júrgizdi. Taraptar ekijaqty qarym-qatynastardy jandandyrýǵa, ekonomıkalyq seriktestikti keńeıtýge basa nazar aýdardy.

– Sizdi Birikken Arab Ámirlikterinde kórgenime qýanyshtymyn. Ámirlikter basshysynyń atynan Sizdiń saparyńyzǵa tabys tileımin. Sonymen qatar bizdiń jaqyn dosymyz Elbasy Nursultan Ábishuly Nazarbaevqa sálem joldaımyz. Qazirgi ýaqytta elderimiz arasyndaǵy ekijaqty qatynastar joǵary deńgeıde damyp keledi. BAÁ Qazaqstanmen ózara yqpaldastyqty nyǵaıtýǵa erekshe kóńil bóledi. Memleketterimiz arasyndaǵy yntymaqtastyq jan-jaqty damýda, - dep atap ótti Muhammed ben Zaıd Ál Nahaıan.

Memleket basshysy Sheıh Muhammedke qonaqjaılyq tanytqany úshin rızashylyq bildirip, Qazaqstan Prezıdenti retinde óziniń alǵashqy saparyn arab álemine, sonyń ishinde Birikken Arab Ámirlikterine jasap otyrǵanyn atap ótti.

– Eki el arasyndaǵy qarym-qatynastar tarıhynyń tamyry tereń. Bizdi shynaıy dostyq, ózara senim men túsinistik baılanystyrady. Sondyqtan qarym-qatynastarymyzdyń keleshegi zor. Meniń saparymnyń negizgi maqsaty – eki memlekettiń yntymaqtastyǵyna tyń serpin berý. Biz úlken jetistikterge qol jetkizdik, biraq bir orynda toqtap qalýǵa bolmaıdy. Alǵa jyljýymyz kerek. Men osy saparǵa erekshe mán beremin jáne úlken úmitpen qaraımyn, - dedi Qasym-Jomart Toqaev.

Kezdesý barysynda munaı-hımııa, aýyl sharýashylyǵy, kólik-logıstıka, qarjy jáne ınvestısııa salalaryndaǵy ózara is-qımyldar men yntymaqtastyq máseleleri qarastyryldy.

Qasym-Jomart Toqaev eki memlekettiń de mańyzdy tarıhı kezeń aldynda turǵanyn – kelesi jyly Ámirlikterdiń qurylǵanyna 50 jyl, Qazaqstannyń Táýelsizdik alǵanyna 30 jyl tolatynyn atap ótti.

Kezdesý sońynda taraptar qol qoıylǵan qujattarmen almasty. QR Energetıka mınıstrligi men BAÁ Energetıka jáne ónerkásip mınıstrligi arasynda munaı-hımııa ónerkásibi salasyndaǵy ózara túsinistik pen yntymaqtastyq týraly memorandýmǵa, Qazaqstan Respýblıkasynyń Saýda jáne ıntegrasııa mınıstrligi men BAÁ Ekonomıka mınıstrligi arasyndaǵy ózara túsinistik týraly memorandýmǵa, «Astana» halyqaralyq qarjy ortalyǵynyń Qarjylyq qyzmet kórsetýdi retteý jónindegi komıteti men BAÁ Ortalyq banki arasyndaǵy ózara túsinistik týraly memorandýmǵa qol qoıyldy.

Sońǵy jańalyqtar

Mańǵystaýda «ANTIKOR ORTALYGY» ashyldy

Rýhanııat • Búgin, 11:38

Tennıs: Elena Rybakına fınalda

Tennıs • Búgin, 08:52

Basty aqparat (21.02.2020)

Vıdeo • Keshe

Uqsas jańalyqtar