Teatr ujymy uly aqynnyń 175 jyldyq mereıtoıyna arnaǵan is-sharalaryn Ahmet Jubanov pen Latıf Hamıdıdiń áıgili «Abaı» operasynan bastap Ulttyq klassıka jaýhary kórermenge usyndy.
«Abaı» operasynda basty keıipker Abaı partııasyn Qazaqstannyń eńbek sińirgen qaıratkeri Janat Shybyqbaev oryndady. Áleýmettik ádiletsizdiktiń qurbany Aıdar partııasyn oryndaǵan – Qazaqstannyń eńbek sińirgen qaıratkeri Meıir Baınesh.
Al ústem taptyń ókili, ozbyrlyǵymen, ádiletsizdigimen tanylǵan Jırenshe beınesin – Talǵat Ǵaleev somdady.
Kórgen kúni azap pen aýyrtpalyqqa toly keıipker Ajar beınesinde teatr solısi «Qurmet» ordeniniń kavaleri Aızada Kaponovanyń debıýti sátti shyqty.
Operada shynaıy ómirdegideı ózindik oı pikiri joq, syrty «ádemi» kóringenimen, ishi kórealmaýshylyqqa toly, báz bireýlerdiń aıtaǵymen júrip, tek kereǵar tirlik jasap, zııan ispen aınalysatyn keıipker bar. Ol - Ázim. A.Jubanov shyǵarmasynda Ázim rolin teatr solısi – Beıimbet Tańaryqov usyndy. Qarlyǵash rolin – Saltanat Muratbekova, Kókbaıdy – Erjan Saıpov, Syrttandy – Bolat Esimhanov, Narymbetti – Erulan Kamel, Mesti – Shyńǵys Rasylhan syndy solıster oryndady.
«Astana Opera» sımfonııalyq orkestri men hory halyqaralyq baıqaýlardyń laýreaty Rýslan Baımýrzınniń jetekshiligimen óner kórsetti.
Aıta keteıik, «Astana Operada» Muhtar Áýezovtiń lıbrettosyna sahnalanǵan spektakldiń premerasy 2015 jyldyń 25 qyrkúıeginde ótken bolatyn.
Qoıylymnyń mýzykalyq jetekshisi – teatrdyń bas dırıjeri, Qazaqstannyń eńbek sińirgen qaıratkeri, QR Memlekettik syılyǵynyń laýreaty Alan Bóribaev, qoıýshy rejısser – Djankarlo del Monako (Italııa). Keńesshi rejısser – Qazaqstannyń Halyq ártisi Esmuqan Obaev. Bas hormeıster – Qazaqstannyń eńbek sińirgen qaıratkeri Erjan Dáýitov. Qoıýshy rejısserdiń assıstenti – Erenbaq Toıkenov, jaýapty konsertmeısterler – Elena Sahno, Irına Kýrgýzkına.
Operanyń kórkemdik bezendirilýin jasaǵan shyǵarmashylyq tandem – tanymal ssenograf Esıo Frıdjerıo men «Oskar» syılyǵynyń laýreaty, kostıýmder boıynsha sýretshi Franka Skýarchapıno (Italııa).
