Aımaqtar • 28 Qańtar, 2020

Aqtóbede bir mıllıon sharshy metr turǵyn úı salyndy

26 retkórsetildi

Aqtóbe oblysynyń áleýmettik-ekonomıkalyq damý qarqyny joǵarylap keledi. Sońǵy kezderi óńirde bes paıyzdyq kólemdegi ekonomıkalyq ósim turaqty túrde saqtalyp júr. О́z kezeginde bul jetistik respýblıkalyq deńgeıden joǵary, al el óńirleri arasynda eń aldyńǵy kórsetkish ekenin aıtqan jón. Bul jaǵymdy jáıt Qazaqstannyń Tuńǵysh Prezıdenti – Elbasy Nursultan Nazarbaevtyń: Aqtóbe tutastaı el ekonomıkasyn alǵa tarta alatyn lokomotıv rólin atqara alady degen sózi tekten-tekke aıtylmaǵanyn aıǵaqtaıdy.

О́tken jyldyń qorytyndysy boıynsha oblysta áleýmettik-ekonomıkalyq deńgeıdiń barlyq salasynda ósý dınamıkasy qamtamasyz etildi. Al ótken 2019 jyly oblysta bir mıllıon sharshy metr turǵyn úı paıdalanýǵa berilgeni bólek bir áńgimeniń enshisi. Bul bıik beles te el óńirleri arasyndaǵy rekordtyq kórsetkish bolyp otyr. Árıne bul esepke Almaty men Nursultan jáne Shymkent megopolısteri kirmeıtini aıtpasa da túsinikti.

Buǵan deıingi jasalǵan taldaýlar men saraptamalar óńirde tabıǵı demografııalyq ósim aldyńǵy jyldarmen salystyrǵanda artyp kele jatqanyn kórsetedi. Sonymen birge turǵyndardyń dınamıkalyq aǵymy men ishki kóshi-qon úderisteri de buryn-sońdy bolyp kórmegen joǵary deńgeıge jetti. Bul faktorlar qazirgi kezde turǵyn úıge degen úlken suranys týǵyzdy.

О́tken jyly Aqtóbede bir mıllıon sharshy metr turǵyn úı salý kózdelip, oǵan oıdaǵydaı kol jetkizilgenine osyndaı suranystar men talaptar qozǵaý salǵany da basy ashyq másele.

Árıne osymen búkil isti bittige sanaýǵa bolmaıtyny belgili. Bıylǵy jyly da óńirde osy bıik mejeniń deńgeıin tómen túsirip almaý joldary qarastyrylǵan. Aqtóbe oblysynyń ákimi Ońdasyn Orazalınniń aıtýynsha bıylǵy 2020 jyly turǵyndardyń áleýmettik áljýaz toptaryna turǵyn úı kómegin kórsetýge basymdyq berý baǵyttary belgilengen. Búgingi kúni Aqtóbede turǵyn úıge ıe bolý jáne satyp alý kezeginde 30 000 adam turǵany, sonymen birge 150 000 azamat oblys ortalyǵynyń irgesi men mańynan jeke turǵyn úı qurylysy úshin jer telimderin alýǵa ótinish bergeni de jaýapkershilik júgin salmaqtandyra túsedi.

Búgingi kúni Aqtóbe aglomerasııasy aýmaǵynda qarqyndy jumys qurylystary odan ári jalǵasýda. Respýblıka Prezıdenti Qasym-Jomart Toqaev bıylǵy 2020 jyldyń 27 qańtary kúni Úkimettiń keńeıtilgen otyrysynda aldaǵy ýaqytta turǵyn úı salý máselesi Úkimet jumysynyń basym baǵyty bolýy tıis ekendigin atap kórsetkeni málim. Bul mindettiń jergilikti atqarýshy organdarǵa da tikeleı qatysy bar ekeni kámil. Sondyqtan da qazirgi kezde aqtóbelik qurylysshylar osy talap deńgeıi men údesinen kórinýge bekem bel býyp otyr.

AQTО́BE

Sońǵy jańalyqtar

Beıqamdyqqa jol berilmeýi kerek

Rýhanııat • Keshe

Koronavırýssyz Qostanaı

Aımaqtar • Keshe

Kúrish eksportyna kedergi joq

Aımaqtar • Keshe

Álem únemdele bastady

Álem • Keshe

Uqsas jańalyqtar