Qoǵam • 28 Qańtar, 2020

Betpaqdalada adasyp ketken úsh júrgizýshi tabyldy

1124 retkórsetildi

Aqtútek boranda Betpaqdalada adasyp ketken 3 júrgizýshi birneshe táýlikten soń tabyldy. Bul týraly Túrkistan oblystyq Polısııa departamentiniń baspasóz qyzmeti habarlady.

Departamenttiń málimetinshe, 26 qańtar kúni Sozaq aýdandyq polısııa bólimine Shymkent qalasynyń turǵyny habarlasyp, Qaraǵandydan Túrkistan oblysy arqyly aýyr júk kóligimen kele jatqan aǵasymen habarlasa almaı qalǵanyn aıtyp, aryzdanady. Budan soń Sozaq APB polıseıleri aryzdy qabyldap, birden izdestirý jumysyna kirisedi. Aryzdanǵan azamattyń aǵasynyń janynda aýyr júk kóligimen jolǵa shyqqan taǵy eki er azamattyń bar ekeni belgili boldy. Sozaq polıseıleri aýa raıynyń kúrt nasharlaǵanyn eskere otyryp, qutqarýshylarmen jáne erikti jergilikti turǵyndarmen jol talǵamaıtyn kólikterge minip, borandy kúni adasyp qalǵan júrgizýshilerdi izdeýge attandy.

«Osylaısha, tııanaqty júrgizilgen izdestirý jumystarynyń nátıjesinde 3 aýyr júk kóliginiń júrgizýshileri Betpaqdaladan tabyldy. Belgili bolǵandaı, olar Qaraǵandydan Sozaqtaǵy tóte jol arqyly Shymkenttegi úılerine ýaqyt únemdep, tezirek jetpek bolǵan. Alaıda aýa raıy ózgerip, qalyń jaýǵan qar men aqtútek borannyń kesirinen adasyp, kólikterimen omby qarǵa batyp qalǵan», - delingen habarlamada.

Kómekke kelgen polısııa qyzmetkerleri jolǵa shyqpas buryn kólikke kerekti 400 lıtrdeı dızel janarmaıy jáne azyq-túlik alyp shyqqan bolatyn. Júrgizýshiler tabyla salysymen olarǵa azyq úlestirilip, qajetti kómek kórsetildi. Úsh júk kóligine de qajetinshe janarmaı quıylyp, jolǵa shyǵýǵa daıyn boldy. О́z kezeginde boranda adasyp qalǵan úsh azamat alǵys bildirdi.

 

Sońǵy jańalyqtar

Abaı murasyna arnalǵan kórme

Rýhanııat • Keshe

Jaǵa ustatqan jat qylyq

Aımaqtar • Keshe

Uqsas jańalyqtar