Aımaqtar • 29 Qańtar, 2020

Mańǵystaýda Kásipkerler palatasy basshylarynyń esebi bastaldy

76 retkórsetildi

Bıyldan bastap tuńǵysh ret óńirlik Kásipkerler palatasy men oǵan qarasty fılıal basshylary iskerler aldynda eseptik kezdesý ótkizetin boldy. Mańǵystaýda bul keleli sharany MO Kásipkerler palatasy Munaıly aýdandyq fılıalynyń dırektory Mádına Janjigitova bastady. Aldymen oblystaǵy irgeli kásiporyndardyń biri «Kaskor-Mashzavod» AQ ujymyna atqarylǵan jumystar týraly baıandady. Ashyq suhbat alańynda kásiporyn qyzmetkerleri nesıe alý, bıznesti órkendetý, kásipkerlikti súıemeldeý syndy suraqtaryna tushymdy jaýap aldy dep habarlaıdy MO Kásipkerler palatasynyń baspasóz qyzmeti.

M.Janjigitova Munaıly aýdandyq ákimdiginiń májilis zalynda aýdan kásipkerleriniń aldynda esebin jalǵastyrdy. Mańyzdy sharaǵa aýdan ákimi Rahat Elızarov pen óńirlik Kásipkerler palatasynyń dırektory Nurbek Qarasaev ta qatysty. Munaıly aýdanynda Palata fılıaly jumysyn 2015 jyly bastady. Sodan beri aýdan boıynsha kásipkerlik sektoryn damytý, kásipkerlerdiń múddelerin qorǵaý, kásipkerge qolaıly jaǵdaılardy qamtamasyz etý, kásipkerlik salasynda memlekettik saıasatty, bıznesti jáne ákimshilik ózara is-qımyldardy jetildirý, servıstik qyzmet kórsetý qyzmetterin atqaryp keledi.

Munaıly aýdanynda qazir 140 myńdaı adam turady. 5700-deı bıznes sýbekti tirkelgen. Olardaǵy jumyspen qamtylǵan adamdar sany - 10 097. «Bıznestiń jol kartasy - 2020» bıznesti qoldaý men damytýdyń biryńǵaı baǵdarlamasy aıasynda kepildendirý boıynsha 31, sýbsıdııalaý nysanynda 35 jobaǵa memlekettik qoldaý kórsetildi.

О́tken jyly aýdandyq fılıalda kásip ashý boıynsha 100 adamǵa keńes berilgen, taǵy 50-ne bıznes jospar jasaqtaý boıynsha kómek jasaldy. Memlekettik baǵdarlamalar boıynsha keńester 840 kásipkerge, zańgerlik keńester 35 iskerge, býhgalterlik keńester 92 adamǵa, nesıe alýǵa daıyndalatyn qujattar boıynsha súıemeldeý 60 kásipkerge jasaldy.

Eseptik kezdesý óte erkin, ashyq ótti. Iskerlerdi aýyl sharýshylyǵyna sýbsıdııa alý, bıznesti órkendetýge kepilsiz nesıe, qysqa merzimdi kýrstarda oqý máseleleri tolǵandyratyn bolyp shyqty.

Aýdandyq Kásipkerler palatasynyń dırektory Mádına Janjigitova: «Aýdandaǵy kásipkerlerdiń quqyqtaryn qorǵaý jumystary da nátıjeli boldy. 2019 jyly barlyǵy 28 kásipkerdiń quqyǵy qorǵaldy. “Bastaý” jobasymen aýdanda tyńdaýshylar 6 topqa bólinip oqytyldy. Barlyǵy 313 qatysýshy oqýmen qamtyldy, onyń ishinde 39 qatysýshy  grant ıgeri atandy.

«Jas kásipker» jobasymen 108 qatysýshy oqyp shyǵyp, onyń ishinde 32 qatysýshy 505 myń teńge grant ıegeri atandy. Al «Bıznes keńesshi» boıynsha 192 adam oqytyldy. «Bıznes ósý» oqýy boıynsha  43 kásipker bilim aldy» dedi.

Munaıly aýdany boıynsha shaǵyn nesıeler boıynsha 97 adam 510,6 mln teńge alǵan. Onyń ishinde «Atameken» Mıkroqarjy uıymy arqyly 12 kásipker 108,4 mln teńgege qol jetkizdi.

Aǵymdaǵy jyldyń qyrkúıeginde Munaılyda aýdannyń ekonomıkalyq áleýetin egjeı-tegjeıli zertteý maqsatynda shaǵyn jáne orta bızneske saýalnama júrgizý arqyly skrınıng jobasy bastaldy. Skrınıng nátıjesinde alynǵan aqparat negizinde naqty mamandanýdy qarastyratyn aýdandyq damýdyń kartasy ázirlenedi. Karta aýdannyń agrarlyq, óńdeý ónerkásibi jáne basqa salalardyń ósý núktelerin, sondaı-aq, olardaǵy qajettilikterdi kórsetetin bolady. Osy oraıda aýdannyń úı sharýashylyqtary men kásipkerlik sýbektilerge skrınıng júrgizý sátti aıaqtaldy. Úı sharýasyndaǵy 22 140 adam, al 5138 kásipkerlik sýbektisi arnaıy bazaǵa engizildi.

Oblystyq Isker áıelder keńesiniń qoldaýymen aýdanda 2 oqý ortalyǵy, 4 balabaqsha ashyldy. IÁK uıymdastyrýymen ótken «Sán quraq» festıvalinde keńes múshesi, Munaıly turǵyny G. Demeýova birinshi orynǵa ıe boldy. Aýdannan 5 qyz-kelinshek qatysty. IÁK-niń múshesi Áýes Saǵynaeva 11 mektepte aýdannyń qyz-kelinshekterine tekemet basýdyń jańa tehnologııasyn úıretip, úsh kúndik aqysyz trenıng uıymdastyrdy. Munaıly aýdanynda 2019 jyly atqarylǵan tolaǵaı tabystar jeterlik. Bıyl da sol isterdi jalǵastyrý mejelengen.

Eseptik kezdesýler oblystyń barlyq qala, aýdan kásipkerlerimen ótedi.

Sońǵy jańalyqtar

Ystyq tamaq taratty

Qazaqstan • Keshe

Betperde kıgen kóktem

Tanym • Keshe

Uqsas jańalyqtar