Álem • 29 Qańtar, 2020

Qytaıdan kelgender túgel baqylaýda bolady

55 retkórsetildi

Qazaqstannyń bas sanıtarlyq dárigeri Jandarbek Bekshın koronavırýstyń aldyn alý sharalary boıynsha atqarylyp jatqan jumystar men aýrý belgileri baıqalǵan naýqastardyń jaǵdaıy týraly kúndelikti brıfıng ótkizýde.

Jýrnalıstermen búgingi kezdesýinde elimizdiń bas sanıtarlyq dárigeri buqaralyq aqparat quraldary arqyly kásipkerlerge ótinish bildirdi.

«Qazaqstanda dástúrli medısınalyq maskalardyń 5 otandyq óndirýshisi bar. Qurmetti otandyq medısınalyq maska óndirýshiler! Biz tek dári-dármektiń eń joǵary baǵasyn retteımiz. Maska baǵasyn retteı almaımyz. Sondyqtan da el azamattary úshin qajetti kólemde maskalar shyǵarýlaryńyzdy ótinemiz» dedi ol. 

Jandarbek Bekshınniń aıtýynsha, 6 qańtardan beri Qytaıdan elimizge 12 610 adam kelgen. Onyń 12 365-i Qazaqstan azamaty bolsa, 245-i – sheteldik. Medısına mamandary olardyń  51,1%-yna, atap aıtqanda, 6 449 adamǵa qońyraý shalyp, shaǵymdaryn surap sóılesken. Olardyń barlyǵyn baqylaý úshin bul jumystyń jalǵasa beretinin jetkizgen bas sanıtarlyq dáriger: «Qazirgi ýaqytta 35 adam jeke aýrýhanaǵa jatqyzylyp, bólek bólmelerde  oqshaýlandy. Olardyń 22-sine jedel respıratorlyq vırýstyq ınfeksııa (JRVI/ORVI), 4-ine tumaý, bireýine tumaý jáne paraınflıýsenoz dıagnozy qoıyldy. Osylaısha, 27 adamda maýsymdyq syrqat anyqtaldy. Qalǵan 8 adamdy jáne budan keıingi syrqattardy baqylaý úshin synamalar alyp, Almatydaǵy Aıqymbaev atyndaǵy Ulttyq ınfeksııalyq ǵylymı ortalyǵyna jiberemiz. Bul ortalyq jańa koronavırýsty PTR-dıagnostıkalaý ádistemesin ıgergen. Qazaqstanda koronavırýs ınfeksııasyn boldyrmaýdyń barlyq resýrstary bar, sondaı-aq, biz Dúnıejúzilik densaýlyq saqtaý uıymymen jáne Reseımen ózara kásibı kómek týraly kelistik» dedi.

Sonymen qatar J.Bekshın ár aımaqtaǵy jaǵdaıǵa da jeke-jeke toqtaldy. Spıker Haınanda demalyp kelgen qyzylordalyq azamattyń sýyq tıgizgenin, jambyldyq bir pasıentke JRVI dıagnozy qoıylǵanyn, al Almatydaǵy naýqastardyń jaǵdaıy ońalǵandyqtan, jaqynda úılerine qaıtatynyn aıtty.  

Dúnıejúzilik densaýlyq saqtaý uıymy Qytaı memleketi epıdemııanyń aldyn alýǵa qabiletti ekendigine senimdi. Halyqaralyq uıym álem elderine óz azamattaryn Qytaıdan evakýasııalaýǵa keńes bermeıdi, óıtkeni olar halyqaralyq qaýymdastyqty sabyrly bolýǵa jáne bolyp jatqan oqıǵalarǵa shamadan tys reaksııaǵa jol bermeýge shaqyrady. Osyny aıtqan J.Bekshın Mádenıet jáne sport mınıstrligi memlekettik qyzmetshilerdiń is-saparlaryn shekteıtin qaýly shyǵaryp, barlyq halyqaralyq buqaralyq sporttyq jarystar keıinge qaldyrylǵanyn jáne Qytaıda temirjol jolaýshylar tasymaly toqtatylǵanyn atap ótti.

Sońǵy jańalyqtar

Ystyq tamaq taratty

Qazaqstan • Keshe

Betperde kıgen kóktem

Tanym • Keshe

Uqsas jańalyqtar