Kesheli-búgin áleýmettik jelini Damır Qudaıbergen esimdi polısııa qyzmetkeriniń betin muz basqan fotosýreti sharlap ketti. Arqanyń at qulaǵy kórinbeıtin alapat boranynda jolda qalǵandardyń amandyǵy úshin aıanbaı qyzmet etken «Muz polıseıge» degen eldiń peıili erekshe. Damırge jurt dán rıza bolyp jatyr.
Keshe kezekshiligin tapsyryp, úıinde demalyp jatqan Damır Qudaıbergenmen az-kem suhbattasýdyń sáti túsken edi.
– Damır, sizdiń betińizdi muz basqan fotosýretińiz áleýmettik jeli qoldanýshylar arasynda qyzý talqyǵa túsip jatyr. Bul sýret qandaı jaǵdaıda túsirildi?
– Aldyńǵy kúni tańerteń qatty boran soqqanda biz áriptesim, polısııa leıtenanty Bolatbek Nurolla ekeýmiz arnaıy tehnıka arshyǵan joldaǵy jıyrma shaqty kólikten turatyn kolonnanyń sońynan júrip otyrdyq. Temirtaý men Qaraǵandynyń orta tusyna kelgende kólikter omby qarǵa keptelip, júre almaı qaldy. Boran bolsa kúsheıip, qarǵa adym jerdi kórý muńǵa aınaldy. Qar, tipti, mashınalardyń ústinen júrip ketti.
Jaǵdaı osyndaı bolǵan soń biz adamdardy kólikterden shyǵara bastadyq. Sol kezde kómekke aǵa leıtenanttar Danııar Kenjebekov, Taıtóleý Januzaqov jáne batalon komandıriniń orynbasary polısııa kapıtany Bekzat Sáýlembaev kelip jetti. Biz 40 shaqty adamdy arnaıy tehnıkalarǵa jáne ózimizdiń qyzmettik kólikterimizge otyrǵyzyp, oblys ortalyǵyna jetkizip saldyq.
Al fotony biz qutqarǵan adamdardyń biri túsirse kerek. Aıtaıyn degenim, kólik ıeleriniń kóbisiniń boıynda úreı boldy. Olarmen jeke-jeke áńgimelesip, sabyrǵa shaqyryp, tynyshtandyrýǵa týra keldi.
– Qazirgi ýaqytta densaýlyǵyńyz qandaı jaǵdaıda?
– Tamaǵyma azdap sýyq tıgeni bolmasa, bári oıdaǵydaı. Meniń áleýmettik jelide tarap ketken fotomdy kórip, týǵan-týystar jan-jaqtan habarlasyp, alańdaýshylyq bildirip jatyr. О́zim de bul sýretti úıge kelgende bir-aq kórdim.
Jalpy, munda turǵan túk te joq dep oılaımyn. Sol jerde menimen birge bolǵan áriptesterim de qıyn jaǵdaıǵa tap bolǵan azamattarǵa jan aıamaı kómek kórsetti. Adamdarǵa qol ushyn berý – bizdiń qyzmettik paryzymyz ǵoı.
– Polısııa qatarynda jumys istep júrgenińizge qansha ýaqyt boldy? О́zińizdi tanystyra ketseńiz.
– Qaraǵandy qalasynyń týmasymyn. Ishki ister organdarynda 2011 jyldan beri jumys isteımin. Byltyr batalonǵa aýystym. Qazir oblystyq polısııa departamentine qarasty patrýldik polısııa qyzmetiniń ınspektory bolyp qyzmet etemin. Polısııanyń aǵa leıtenanty degen shenim bar.
– О́zińizdiń otbasyńyz týraly aıtsańyz. Qyzmetten oralǵanda úıde sizdi kimder kútip otyrady?
– Zaıybym ekeýmiz eki ul ósirip jatyrmyz. Ol kisiniń esimi Nazıra, úıde bala tárbıesimen aınalysady.
– Qajyrly qyzmetińizge rahmet.
Áńgimelesken
Qaırat ÁBILDA,
«Egemen Qazaqstan»
Qaraǵandy oblysy
