Kıno • 30 Qańtar, 2020

Model Alla Elshin týraly fılm Parıjde kórsetildi

120 retkórsetildi

2019 jyldyń  kúzinde Alla jaıly kınonyń jobasyn daıyndap jatqan Fransııada turatyn qazaq Berlın Irıshev  bastaǵan  shyǵarmashylyq  top onyń jobalyq nusqasyn qazaqstandyq jýrnalısterge tanystyrǵan bolatyn.

Sol kezde búgin Parıjde kórsetilip jatqan kınonyń jobasy qazaqstandyq jýrnalıster nazaryna usynylǵan. Kıno-jobany daıyndaýshy shyǵarmashylyq toptyń  Allanyń qobyz úniniń súıemeldeýimen appaq keńistikke – bolashaqa bettep bara jatýymen aıaqtaý týraly usynysyn almatylyq jýrnalıster yqylaspen qabyldaǵanbyz.  

Búgin ol aıaqtalyp, parıjdik talǵampaz kórermenniń nazaryna usynylǵany jaıly habar esittik.    

Apta basynda Parıjde dúnıejúzilik sán ańyzy Krıstıan Dıordyń mıýzıkli, qazaq Alla Elshinge arnalǵan alǵashqy fılmniń jabyq premerasy ótti. Bul týraly Habar24 tilshisi habarlady. Sán sarapshylary men Fransııadaǵy Qazaqstandyqtar qaýymdastyǵynyń músheleri bizdiń elshilik ǵımaratynda alǵashqy kórsetilimge jınaldy. Dál osy uıym óz qarajaty esebinen Alla týraly fılm túsirdi.

Bir jarym jyl ishinde belsendiler muraǵatta modeldiń ómiri týraly aqparattar jınady, Alla Elshindi bilgen adamdarmen kezdesti. Eger buryn modelder Manchjý tamyryna baılanysty bolsa, onda onyń ómiriniń negizgi zertteýshisi Berlın Irıshev Dıor juldyzynyń etnıkalyq qazaq ekenin dáleldeı aldy. Kórermender nazaryna usynylǵan kıno-kartınada Allaǵa qatysty kóptegen derekti fakti alǵash ret usynylǵan. 52 mınýttyq fılm keıin Fransııada da, Qazaqstanda da kópshilikke kórsetiledi.

Ańyzǵa aınalǵan qazaq áıeliniń derekti ómirbaıany sonshalyqty úlken qyzyǵýshylyq týdyrdy, onyń avtorlary Alla Elshin týraly kórkem fılm jasaýdy oılady. Joǵary sán mamany Djýlııa Gaıon jýrnalıstermen kezdesken kezde Fransııada turatyn adamdar ony Dıordyń sán sıqyrshysy retinde tanıtynyn, qurmetiniń erekshe ekenin aıtypty. «Alla taǵdyry týraly jasalǵan zertteý jumysynyń sapasy tańǵaldyrady» deıdi ol.  

Alla Elshin tek sulý, symbatty manekenshi ǵana emes, ol jeke kózqarasy qalyptasqan tulǵa, talǵamy bıik áıel bolǵanyn zamandastary kúni búginge deıin aıtyp keldi. 

Suhbattardyń birinde Nıý-Iork jáne Parıjdiń túngi saýyq-oryndaryn salystyra otyryp, bylaı dep sıpattaıdy: «Latyn kvartalynyń» qonaqtaryna qaıran qalamyn. Mundaı kıimdermen men eshqaıda úıden attap baspas edim, budan da jalańash júrgen artyq. Parıjdegi Folies Bergere qonaqtary da pýrıtandyǵymen erekshelenbeıdi. Alaıda olar jalańashtanýdy ashyq ári ekijúzdiliksiz nasıhattaıdy».

Allanyń ózi podıýmdarda dekolte men qysqa ıýbkalardy kııýden qysylǵan emes. Iv-Sen Lorannyń ashyq kolleksııalaryn da talaı kórsetken. Alaıda ómirde ol ustamdy stıldi unatatyn edi. 1957 jyly Lubbock Avalanche basylymyna bergen suhbatynda bylaı depti:  «Men ózimdi svıter, keń shalbar men ıýbka kıip júrgende jaqsy sezinemin. Keshkilik joldasym ekeýmiz bir jaqqa shyqqanda men qara tústi kıimdi jáne omyraýy jabyq kıimder tańdaımyn».

Parıjdiń, sodan soń álemniń sánqoı bıkeshteri Alladan keıin kózin qıǵash etip boıaı bastaǵanyn Parıjde shyqqan basylymdardyń bári jarııalaǵan kezinde. Qıǵash qas pen qara qolań shash sol kezde sán álemi úshin trendke aınalypty. Alla Dıor kolleksııasymen álemniń túkpir-túkpirin aralady. Ol model mansabyn 1967 jyly aıaqtady. Degenmen sońǵy ret model 1987 dyly Dıor úıiniń 40 jyldyq mereıtoıyna oraı podıýmǵa shyǵypty. Berlın Irıshevtiń «Mýza Dior. Istorııa Ally Ilchýn» kitabynda álemge tanylǵan modeldiń ómir derekteri, sırek sýretteri, ol týraly estelikter jınaqtalǵan.

Avtordyń aıtýy boıynsha, kitapty jazý barysynda túrli mıstıkaǵa toly oqıǵalar bolǵan. Kıno jelisi de  B. Irıshev jazǵan kitap boıynsha túsirilgen.  

Berlın Irıshev keshe áleýmettik jelidegi paraqshasynda Alla týraly kıno-kartınanyń tolyq nusqasy Qazaqstanda qashan kórsetiletini jaıly qosymsha habarlaıtynyn aıtypty.  

Demek, Qazaqstanǵa sán áleminiń padıshasy Alla týraly jańa týyndy kele jatyr dep aıtýǵa bolady.

 

ALMATY

Sońǵy jańalyqtar

Beıqamdyqqa jol berilmeýi kerek

Rýhanııat • Keshe

Koronavırýssyz Qostanaı

Aımaqtar • Keshe

Kúrish eksportyna kedergi joq

Aımaqtar • Keshe

Álem únemdele bastady

Álem • Keshe

Uqsas jańalyqtar