Qarjy • 31 Qańtar, 2020

Salymshylarǵa ótem tóleý merzimi uzartyldy

10 retkórsetildi

Eýrazııalyq banki bólimshelerinde «Astana Banki» AQ salymshylaryna ótem tóleý merzimi 2020 jyldyń 27 shildesine deıin uzartyldy. Qazaqstannyń depozıtterge kepildik berý qory (QDKBQ) men Eýrazııalyq bank tıisti kelisimge qol qoıdy.

 

Eýrazııalyq banki bólimshe­le­rin­de «Astana Banki» AQ salym­shylarynyń ótinishteri qabyldanyp, qarastyrylady jáne tólem júr­gizi­le­di. Salymshynyń tańdaýy boıynsha aqsha qolma-qol tólenýi nemese bank­tik shotqa aýdarylýy múmkin.

Eýrazııalyq banki «Astana Banki» AQ salymshylaryna ótemdi 2019 jylǵy 26 qańtardan bastap QDKBQ atynan jáne qarajaty esebinen tóleıdi. Salymshylar aldyndaǵy mindettemelerdiń 75%-y tólem bastalǵannan bastap alǵashqy úsh kúnde, 95%-y birinshi aıda óteldi. Búgingi tańda «Astana Banki» AQ salymshylaryna 37 mıllıard teńge tólendi, al agent bankke júginbegen salymshylardyń aldyndaǵy mindet­te­melerdiń qaldyǵy bastapqy min­det­temeler somasynyń tek 1%-yn quraıdy. Tólem alýǵa ótinish ber­gen salymshylardyń sany kóp emes: «Astana Banki» AQ 268 myń salymshylarynyń tek 59 myń salymshysy agent bankke júgingen, al aımaqtar boıynsha júginýlerdiń paıyzy 28%-dan aspaıdy. Negizgi sebep – az qaldyqty shottardyń kóp sany: talap etilmegen depozıtterdiń shamamen 95%-y – 5 myń teńgeden kem somaǵa, onyń ishinde 80%-y – 1 myń teńge sheginde. Salymshylar ádette, shaǵyn depozıt boıynsha ótem alýǵa asyqpaıdy.

Alaıda, iri depozıtter da qalýda: agent bankke áli ótinish bildirmegen eki salymshy eń joǵary ótem somasyna – 10 mıllıon teńge, 30 salymshy – mıllıon teńgeden astam, 346 adam – 100 myń teńgeden astam jáne 5 myń adamnyń 10 myń teńgeden astam depozıtteri bar.

Osy jaǵdaıda QDKBQ jáne Eýrazııalyq banki basshylyǵy «Astana Banki» AQ salymshylary­na olar turatyn jáne jumys isteıtin oryndarda tólem alý múm­kin­digin odan ári qamtamasyz etý qajet dep sanady. Eýrazııalyq bank Qazaqstannyń 33 qalasynda usynylǵan jáne 17 fılıaly men 114 bólimshesi bar, al keıbir bólimsheleri demalys kúnderi de jumys isteıdi. Iаǵnı, «Astana Banki» AQ salymshylaryn Eýrazııalyq banktiń kez kelgen bólimshesinde kútýde. Eger salymshy tólem alýǵa jeke ótinish bildirse, bólimshedegi shot menedjerine jeke basyn kýálandyratyn qujatpen júginý jetkilikti, al ótinish blankisin sol jerde toltyrýǵa bolady. О́tinishti qaraýdyń jáne aqsha tóleýdiń eń uzaq merzimi – 5 jumys kúni. Agent banki salymshylardyń senim bildirgen tulǵalarynyń da ótinish­terin qaraıdy. Senimhat notarıýs­pen kýálandyrylýy tıis. Bas jáne arnaıy nemese bir rettik senimhatty da qabyldaıdy.

QDKBQ-dan tólemniń eń joǵary somasy – teńgedegi depozıtter bo­ıynsha (salymdardy, aǵymdaǵy shottardy jáne tólem kartochkalaryn qosa alǵanda) 10 mıllıon teńgeni, shetel valıýtasyndaǵy depozıtter boıynsha – 5 mıllıon teńgeni, taratylatyn bankte bir mezgilde teńgemen jáne shetel valıýtasymen ornalastyrylǵan bir salymshynyń depozıtteri boıynsha – 15 mıllıon teńgeni (sońǵy jaǵdaıda – 5 mıllıon teńgeden aspaıdy) quraıdy. Barlyq tólemder tek teńgemen beri­ledi. Shetel valıýtasyndaǵy sa­lym­­dar boıynsha óteý bankti máj­búr­lep taratý týraly sot sheshimi zańdy kúshine engen kúngi valıýta aıyr­bastaýdyń naryqtyq baǵamy boıynsha – 2019 jylǵy 9 qańtarǵa: depozıtter boıynsha AQSh dollarymen – 373,66, eýromen – 427,80, Reseı rýblimen – 5,57 boıynsha esepteledi.

Eske sala ketsek, «Astana Banki» AQ 2018 jyldyń 18 qyr­kúıe­gin­de barlyq banktik operasııa­lar­dy júrgizýge lısenzııadan aıyrylǵan bolatyn. 2018 jyldyń 26 qara­shasynda Almaty qalasynyń maman­dandyrylǵan aýdanaralyq ekonomıkalyq sotymen bankti yq­tııar­syz taratý týraly sheshim qabyl­dandy. Bul sheshim 2019 jyl­dyń 9 qańtarynda zańdy kúshine endi. 2019 jyldyń 26 qańtarynda «Eýrazııalyq bank» AQ qazaqstandyq depozıtterdi kepildendirý qorynyń atynan jáne qarajattary esebinen salymshylarǵa – jeke tulǵalarǵa jáne jeke kásipkerlerge óteýdi tóleı bastady.

Qazaqstannyń depozıtterge ke­pil­d­ik berý qory «Astana Banki» AQ, «Qazaq Banki» AQ jáne «Qaza­qstan Eksımbanki» AQ salym­shylaryna tólem jasaýdy jalǵastyrýda. Osy bankterdegi depozıtterdiń 99,3%-y tolyǵymen kepildikpen qorǵaldy jáne salymshylar jınaqtalǵan syıaqysy bar óz depozıtiniń tolyq somasyna ótemaqy aldy nemese alýǵa quqyly. Qazirgi ýaqytta úsh banktiń salymshylaryna qazaq­s­tan­dyq depozıtterge kepildik berý qorynyń rezervinen 57,7 mıllıard teńge tólendi. Zańnamaǵa engizil­gen sońǵy ózgeristerge sáıkes, 2020 jyldyń 1 qańtarynan bastap QDKBQ barlyq bank operasııalaryn júr­gizýge lısenzııadan banktiń aıyry­lý kúninen bastap 35 jumys kúni ishinde tóleýdi bastaıdy – sot sheshim­derin kútý alynyp tastaldy. 2018 jylǵy qazanda qazaqstandyq qarjy naryǵynda 15 mıllıon teńgege deıin (teńgemen salymdar boıynsha) joǵary kepildikpen jınaq salymdary paıda boldy. Qazirgi ýaqytta bank júıesi boıynsha depoz­ıtterdiń 99,8%-y tolyq somaǵa qorǵalǵan.

 

Sońǵy jańalyqtar

Beıqamdyqqa jol berilmeýi kerek

Rýhanııat • Keshe

Koronavırýssyz Qostanaı

Aımaqtar • Keshe

Kúrish eksportyna kedergi joq

Aımaqtar • Keshe

Álem únemdele bastady

Álem • Keshe

Uqsas jańalyqtar