«Frıdom Fınans» AQ Freedom 24 qarjylyq tehnologııa startap-jobasynyń iske qosylǵanyn jarııalady. Qazaqstandyqtar táýlik boıy jumys isteıtin qundy qaǵazdar ınternet-dúkeni arqyly belgili kompanııalardyń aksııalaryn satyp alý múmkindigine ıe bolady. Jobanyń basty artyqshylyǵy – meılinshe jeńildetilgen qyzmet, bank kartasymen onlaın tóleý múmkindigi, aksııalardy alǵashqy úsh aıdyń ishinde satyp alǵan jaǵdaıda komıssııalyq tólemniń alynbaýy. Sonymen qatar ınternet-dúkende belgili kompanııalardyń qundy qaǵazdary bar. Qyzmet Qazaqstannyń kámelettik jasqa tolǵan azamattaryna qoljetimdi.
Saıtta 33 kompanııanyń aksııalary bar. Atap aıtqanda, amerıkalyq Ford Motor Company, Starbucks Corporation, The Coca-Cola Co, Apple Inc., Facebook Inc., Microsoft Corporation, Nike Inc., Tiffany, Exxon Mobil, Tesla Inc., Intel, Pfizer, Bank of America N.A, Freedom Holding Corp., SPDR S&P 500; reseılik «Iаndeks», «Neftıanaıa kompanııa «Lýkoıl», «Novolıpeskıı metallýrgıcheskıı kombınat», «GMK «Norılskıı nıkel», «Aeroflot», «Gazprom», «Sberbank Rossıı», «Rostelekom», «Bank VTB», «Magnıt», sondaı-aq qazaqstandyq «Qazaqstannyń Halyq banki» AQ, «Bank SentrKredıt» AQ, «QazTransOıl» AQ, «QazAtomО́nerkásibi» Ulttyq atom kompanııasy» AQ, «Qazaqtelekom» AQ, Kaz Minerals PLC, «KEGOC» AQ, «Ksell» AQ kompanııalary bar.
Freedom Holding Corp. SEO-menedjeri Tımýr Týrlovtyń aıtýynsha, Freedom 24 – Qazaqstanda qor naryǵyn damytýǵa baǵyttalǵan ınnovasııalyq joba. «Biz naryqqa jańa ınvestorlardy tartýǵa daıynbyz. Osy arqyly kóptegen tutynýshylar qundy qaǵazdar naryǵynyń jańa múmkindikterin tabady. Saıtty ázirleý kezinde zamanaýı aqparattyq tehnologııalar qoldanyldy. Jeńildetilgen qyzmettiń nátıjesinde tutynýshy sanaýly sekýndtyń ishinde tıimdi kelisimshart jasaýǵa múmkindik alady. Barlyq rásim zańdy túrde júrgiziledi.
Reseı Federasııasynda aksııalar dúkeni 6 jyldan astam ýaqyt boıy nátıjeli jumys istep otyr. Tutynýshylar bazasy aıyna 1 myń jańa kelisimshartpen tolyǵady. Qazaqstan úshin bul balamasy joq, erekshe joba», deıdi ol.
Freedom 24.kz dırektory Vıacheslav Kım startap-jobanyń jeke kapıtaldy ósirýge múmkindik beretinin aıtady. Sondaı-aq zamanaýı tehnologııanyń kómegimen, qundy qaǵazdardy satý jáne satyp alý meılinshe jeńildetilgen. Al qor naryǵy barlyq qazaqstandyq úshin qoljetimdi. Aksııalardy satyp alý úshin saıtqa kirip, ózińiz qalaǵan kompanııalardyń aksııalaryn tańdap, bank kartasymen tóleý arqyly satyp alýǵa bolady. Tehnıkalyq turǵydan túsinikti túrde ázirlengen saıtta saraptamalyq maqalalar, sholý men jańalyqtar da ornalastyrylady. Osy arqyly tutynýshylar qor naryǵy men aksııalar týraly bilimderin molaıta alady.
Satyp alýdyń eń tómengi somasy – 3 myń teńge, eń joǵarysy – 1 mln teńge. Bir kúnde quny 1 mln teńgege jetetin aksııalardy bank kartasy arqyly satyp alýǵa bolady. Bul úshin banktiń tólem somasyna qatysty bekitilgen shekteýdi eskerý kerek. Bir kompanııanyń aksııalaryn satyp alý shekteýi aıyna 300 myń teńge. Sonymen qatar saıtta emıtent-kompanııalardyń qarjylyq kórsetkishteri, jańalyqtar, sholý men saraptama sekildi aqparat ta bolady. Qundy qaǵazdardy satyp alý múmkindigine jol ashatyn joba, qor naryǵyna jańadan kelgen tutynýshynyń saýattylyǵyn da molaıtýǵa septesedi. Jobanyń taǵy bir artyqshylyǵy, «Robot-edvaızer» zııatkerlik júıesi. Bul ashyq qoldanystaǵy málimetterdiń negizinde ınvestısııalyq portfel jınaqtaıdy. Portfeldiń quramy tutynýshynyń suranysyna baılanysty úsh túrge bólinedi: passıvti, konservatıvti jáne agressıvti.
«Frıdom Fınans» AQ Qazaqstannyń qor bırjasynda brokerlik qyzmet kórsetedi. Qundy qaǵazdardyń kotırovkalaryn qoldaý úshin market-meıkerdiń qyzmetin kórsetip, qarjylyq konsaltıngti de usynýǵa ázir. Sonymen qatar qaryzdyq jáne úlestik qarjylandyrý boıynsha da qyzmet kórsetedi. Qazaqstanda kompanııanyń 15 bólimshesi jumys isteıdi. Bas keńsesi Almatyda ornalasqan. «Frıdom Fınans» AQ Freedom Holding Corp. halyqaralyq tobyna múshe. Aksııalary amerıkalyq NASDAQ bırjasynda satylady.
