Mınıstrdiń basshylyǵymen barlyq óńirlik bólinisterdegi О́QB bastyqtarynyń qatysýymen keńes ótti. Vedomstvo basshysy óz qatarlarynda quqyq buzýshylyqtyń aldyn alý jáne jolyn kesý boıynsha ótken jyly úlken jumystar atqarylǵanyn atap ótti. El boıynsha jeke quram arasyndaǵy, onyń ishinde sybaılas jemqorlyq sıpatyndaǵy qylmys deńgeıi is júzinde úshten birine qysqardy.
Vedomstvo basshysy aǵymdaǵy jyly qyzmetkerlerdiń jaýapkershiligin arttyrý baǵytyndaǵy jumysqa erekshe nazar aýdarý qajettigin atap ótti.
«Quqyq qorǵaý organdarynyń qyzmetkerleri halqymyzdyń tynyshtyǵy men qaýipsizdigin kúzetý jolynda qyzmet atqarady. Qazaqstannyń árbir azamaty polıseıdiń qorǵaýynda. Bul úlken jaýapkershilik. Biraq bul ishki ister organdarynyń qyzmetkerlerine beriletin erekshe mártebe men ókilettikter. Sondyqtan men О́zindik qaýipsizdik departamentine tek polıseılerdiń zańdylyqty saqtaýyn qamtamasyz etip qana qoımaı, sondaı-aq olardy qorǵaýdy tapsyramyn», dedi mınıstr.
E.Turǵymbaev ózindik qaýipsizdik departamentiniń osy jylǵy basym mindetterin belgiledi: polısııa tarapynan quqyq buzýshylyqtyń barlyq túrleriniń aldyn alý, óz qatarynda turmystyq sybaılas jemqorlyqty joıý. Sondaı-aq О́zindik qaýipsizdik bólimsheleriniń basshylaryna polıseılerdiń zańsyz is-áreketteri faktileri boıynsha azamattardyń barlyq ótinishterine jedel den qoıýdy tapsyrdy.
Sybaılas jemqorlyqqa qarsy turaqty ımmýnıtetke basa nazar aýdara otyryp, basshylyq laýazymdarǵa úmitkerlerge qoıylatyn talaptar arttyryldy. IIM kadr komıssııasy arqyly ótken 600 úmitkerdiń 80-i maquldanbady. Barlyq deńgeıdegi basshylardyń jaǵdaıǵa da, jeke quramǵa da jaýapkershiligi kúsheıtildi.
Budan basqa, azamattyq qoǵammen ózara is-qımyldy keńeıtýge, jurtshylyqpen tikeleı dıalogty jáne keri baılanysty qamtamasyz etýge sharalar qabyldanýda.
«Elimizdiń azamattary ishki ister organdarynyń qyzmetkerlerine júgingende, olar túsinistikti, ózine degen adamgershilik qarym-qatynasty, sondaı-aq olardyń quqyqtary men bostandyqtary laıyqty qorǵalatynyna senimdi bolýy úshin eń qatań standarttar men talaptardy ustaný qajet», dep atap ótti vedomstvo basshysy.
