Senatorlar kezdesý barysynda Eýropa Keńesimen áriptestik qarym-qatynastardy damytý men elimizdiń osy yntymaqtastyq sapasyn arttyrý jónindegi nıetiniń mańyzyn atap ótti.
Eýropalyq parlamentshiler eýropalyq birqatar konvensııalarǵa qosylý jónindegi Qazaqstanda qolǵa alanǵan jumystarymen jáne Eýropa Keńesiniń Qazaqstandaǵy keńsesin ashý jónindegi josparlarymen tanysty. Qazaqstandyq depýtattardyń elimizde júrgizilip jatqan saıası reformalar týraly, onyń ishinde memlekettik basqarý júıesin demokratııalandyrý, kóppartııalyq jáne azamattyq qoǵamdy damytý jónindegi aqparaty júzdesýshilerdiń nazaryn aýdardy.
EKPA-daǵy latysh delegasııasynyń jetekshisi, Parlamenttik Assambleıanyń Vıse-prezıdenti I.Lıbınıa-Egnere eki el arasynda senimdi saıası dıalog qalyptasqanyn, onyń aıasynda saıası, ekonomıkalyq jáne mádenı tyǵyz baılanystar damyp kele jatqanyn atap ótti. Latvııa Seıminiń vıse-spıkeri parlamentaralyq únqatysý, onyń ishinde Parlamenttik Assambleıa aıasyndaǵy tyǵyz yntymaqtastyqty damytý týraly aıta kelip, qazaqstandyq depýtattardy Latvııaǵa kelýge shaqyrdy.
Rýmyn depýtattary Iý.Býlaı, A.Nıkolae jáne V.Badea saýda-ekonomıkalyq kooperasııany ártaraptandyrý, eki eldiń tranzıttik-kóliktik áleýetin damytý jáne stýdentter almasýmen birge mádenı-gýmanıtarlyq baılanystardy óristetýge qarqyn berý týraly aıta kelip, Qazaqstan men Rýmynııa arasyndaǵy ekijaqty yntymaqtastyq deńgeıin joǵary baǵalady. Rýmyn Parlamentiniń joǵarǵy palatasynda sheteldegi rýmyn dıasporasymen baılanys máselelerine jaýap beretin V.Badea Qazaqstanda turatyn etnıkalyq rýmyndar eki memleket arasyndaǵy kópir ekenin atap ótti. Bul rette etnosaralyq kelisimniń qazaqstandyq úlgisiniń ereksheligi men Qazaqstan halqy Assambleıasy sekildi ınstıtýttyń mańyzy atap ótildi. Taraptar kezdesý sońynda eki eldiń Parlamentterinde jumys isteıtin dostyq toptarynyń baılanysy boıynsha parlamentaralyq yntymaqtastyqty tereńdetýdi jaqtaıtynyn aıtty.
