Tehnologııa • 03 Aqpan, 2020

Elektrondy kiltti paıdalana bilemiz be?

1346 ret

kórsetildi

2 mın

oqý úshin

28 qańtar – halyqaralyq derbes derekterdi qorǵaý kúnine oraı «Azamattarǵa arnalǵan úkimet» memlekettik korporasııasynyń tóraıymy Ásemgúl Baltasheva ESQ kiltti durys paıdalaný jáne ony saqtaý joldary jónindegi keńesterimen bólisti.

Egemen Qazaqstan

Elektrondy sıfrly qoltańba – azamattarǵa egov.kz, elicense.kz, enis.kz, salyk.kz sııaqty elektrondy úkimet portaldaryn paıdalanýǵa múmkindik beretin elektrondy kilt. Jeke nemese zańdy tulǵalardyń barlyq derbes málimetterine jol ashatyn sıfrly qoltańbany paıdalanýdyń jáne saqtaýdyń óz erekshelikteri bar.

ESQ-ǵa tapsyrysty pki.gov.kz saıtynan berip, HQO-ǵa tek tulǵany kýálandyrý úshin barýǵa bolady. Alaıda, kópshilik elektrondy kiltti halyqqa qyzmet kórsetý ortalyǵynan alýdy jón kóredi. Byltyr qazaqstandyqtar 7,8 mln elektrondy kilt rásimdegen, bul 2018 jylmen salystyrǵanda 1,7 mln-ǵa kóp kórsetkish. Alaıda, bul, kóp jaǵdaıda, bir adamnyń ESQ-ǵa tapsyrysty bir-aq ret bergenin bildirmeıdi. «Azamattar qujatqa elektrondy tapsyrys beretin kezde nemese deklarasııa tapsyrǵan sátte ǵana ESQ-ny paıdalanyp, keıin ony qaıda saqtaǵanyn umytyp, qupııasózin esten shyǵaryp jatady. Sóıtip ESQ kiltke qaıta tapsyrys beredi. Derbes derekter bazasyn qoljetimdi etetin kiltti qundy dúnıedeı saqtap, muqııat bolý kerek. Biz eshqashan bank kartasynyń pın-kodyn umytpaımyz, al ESQ-nyń qupııasózin este saqtap jattamaımyz. ESQ-ny paıdalaný mádenıeti eń aldymen azamattardyń ózi úshin qajet», deıdi memlekettik korporasııa tóraıymy.

Kóp jaǵdaıda, ESQ rásimdegen sátte, HQO mamandary birdeı qupııasóz bekitip beredi, alaıda qoldanýshy ony jeke kabınetinde keıin ózdiginen jańarta alady. Búginde jeke kýálik chıpyna jazylatyn ESQ 3 jylǵa jaramdy, ony paıdalaný úshin arnaıy kartrıder qajet. Flesh-kartaǵa jazylyp beriletin kilttiń jaramdylyq merzimi – 1 jyl. Sıfrly qoltańbanyń ýaqyty ótpeı turyp, ony onlaın túrde pki.gov.kz saıty arqyly jańartýǵa bolady. Merzimniń aıaqtalatyny týraly sms-eskertpeni alý úshin jeke kabınette uıaly telefon nómiri baılanystyrylýy tıis. «Telefon nómiri men ESQ-ny sáıkestendirgen azamattarǵa elektrondy túrde alynǵan qyzmetter boıynsha habarlamalar kelip turady. Bul sms-ter bógde qyzmetterdiń alynbaýyn baqylap otyrýǵa da múmkindik beredi», deıdi Á.Baltasheva.

Qazaqstandyqtar óz atynda qansha elektrondy kilttiń baryn egov mobile qosymshasynan kórip, kerek jaǵdaıda sol jerden ony qaıtara shyǵarýǵa tapsyrys bere alady.