El aýmaǵy boıynsha vırýstyń taralýyna jol bermeý maqsatynda Dostyq jáne Altynkól stansalaryna kelgen poıyz jolaýshylary men brıgadalary qyzmetkerlerin qazaqstandyq sanıtarlyq qyzmeti tekseristen ótkizedi. Olar teplovızor arqyly jol júrýshilerdiń jaǵdaıyn tekseredi jáne qalin surap-biledi. Sodan keıin jolaýshylar men poıyz brıgadasy qyzmetkerlerine shekaralyq jáne kedendik tekserister júrgiziledi.
Ulttyq tasymaldaýshy jolseriktermen turaqty negizde nusqaýlyqtar ótkizilip, aýyryp qalǵan jolaýshyny anyqtaý kezinde poıyz bastyǵynyń is-áreketin reglamentteıtin, jolaýshylar nemese poıyz brıgadasy qyzmetkeriniń koronavırýspen aýyryp qalý kúdigi týyndaǵan kezde jolaýshylar poıyzy bastyǵy úshin nusqaýlyq ázirlendi.
Jolaýshylar poıyzynyń qozǵalysy kezinde jolaýshylar men qyzmet kórsetý personalynyń koronavırýspen aýyryp qalýy kúdigi týǵanda jolaýshylar poıyzynyń bastyǵy jedel túrde poıyz mashınısi arqyly medısınalyq pýnkt ornalasqan stansanyń kezekshisin nemese vokzal boıynsha kezekshini aqparattandyrýy kerek.
Poıyzdyń toqtaý pýnktine kelýine deıin ol alǵashqy indetke qarsy sharalardy (aýrýdy ózge jolaýshylardan bólekteý, aýrý jolaýshy ornalasqan vagon boıynsha adamdardyń qozǵalysyna tyıym salý, árbir 30 mınýt saıyn shaı ydystaryn, edendi, sanıtarlyq torapty jáne ózgelerine dezınfeksııa júrgizý) ótkizýge mindetti.
Búgingi tańda ýákiletti organmen kelisimi boıynsha atalǵan poıyzdardyń ýaqytsha toqtatylýy jónindegi rásimder ótkizilýde.
Densaýlyq saqtaý mınıstrligi ókilderiniń qatysýymen Almaty jáne Nur-Sultan qalalarynda nusqaýlyqtar ótkizildi. Sondaı-aq poıyz brıgadalarynyń qyzmetkerleri tynys alý maskalarymen jabdyqtalǵan jáne ony únemi taǵyp júrý týraly eskertilgen.
Budan basqa, Qazaqstan men Qytaı arasynda temir jol kóligimen bagaj jáne qol júgin alyp júrýge baqylaý kúsheıtilgen.
