«Ýhannan charterlik reıspen jetkizilgennen keıin karantınge 83 qazaqstandyq jatqyzyldy. Onyń ishinde 80 stýdent bar. Olardyń barlyǵy Nur-Sultan qalasyndaǵy kópbeıindi aýrýhanaǵa ornalastyryldy. Aýrýhana jańa, joǵary qaýipsizdik júıesimen jabdyqtalǵan. Árbir qabattaǵy palatalardyń derbes jeldetý júıesi bar. Bul óte jaqsy júıe – «taza úı-jaı» dep atalady. Ol aýanyń aralasýyna jol bermeıdi. Aýa palatadan dálizge jáne keri baǵytta shyqpaıdy», dedi N.Sádýaqasov. Onyń aıtýynsha, ushaq bortynda dárigerler taǵy bir márte termometrııa júrgizip, jolaýshylardyń qyzýyn ólshegen. «Iаǵnı ushaqta olarmen birge sanıtarlyq avıasııanyń dárigerleri men dáriger-epıdemıolog boldy. Bir áıelde 37,2 gradýs dene qyzýy boldy. Biraq qandaı da bir syrttaı belgileri (koronavıýrs belgileri) anyqtalǵan joq. Olar 2,3 jáne 4 oryndyq palatalarǵa ornalastyryldy, jaǵdaılary jáne tamaqtary óte jaqsy. Júkteri óńdelgennen keıin saqtaý qoımasyna tapsyryldy», dedi ol.
Dárigerdiń sózine qaraǵanda, kópbeıindi aýrýhananyń ınfeksııalyq blogy bir-birinen oqshaýlanǵan. «Qazaqstannyń barlyq qalalarynyń, negizinen Nur-Sultan, Almaty, Shymkent, Aqtaý, Semeı, Qaraǵandy óńirleriniń balalary. Olar bizdiń talaptarymyzben kelisip otyr. Sebebi ol jaqta da dál osyndaı talap bolǵan. Olar ınfeksııalyq bloktyń oqashaýlandyrylǵan palatalarynda jatyr, dálizge shyqpaıdy. Barynsha qaýipsizdik sharalaryn qabyldaýǵa mindettimiz», dedi N.Sádýaqasov.
Al Nur-Sultan qalalyq kópbeıindi medısınalyq ortalyǵy ınfeksııalyq blogy dırektorynyń orynbasary Sáýle Atyǵaeva karantınde jatqan adamdardyń jaǵdaıy jóninde áńgimeledi. «Pasıentterdiń jaǵdaıy keshe tańerteń qanaǵattanarlyq boldy. Olardyń tarapynan aıtarlyqtaı shaǵym joq. Intoksıkasııa belgileri baıqalmaıdy, tynys alýlarynda kemshilik joq, dene qyzýlary shekti normada. Medısınalyq qadaǵalaý ınkýbasııalyq kezeń boıyna jalǵasady. Bul jerde jatqan pasıentterdiń basym bóligi koronavırýs ınfeksııasynyń taralýy joǵary aımaqta bolǵan», dedi dáriger.
Aýrýhanada jatqan pasıentterdiń biri jýrnalıstermen áńgimelesýge kelisim berdi. Onyń aıtýynsha, pasıentterdiń telefondary da ózge zattarmen birge óńdeý úshin alynǵan. Degenmen, aýrýhananyń stasıonarlyq telefony arqyly baılanysýǵa múmkindik bar.
«2016 jyldan beri Ýhan qalasynda boldym. 22 qańtarda qalada karantın jarııalanǵan kezde 100-den astam adam bolǵan edik. Men jáne taǵy eki stýdent evakýasııalaý boıynsha operasııany úılestirýge kómek berdik. Evakýasııalaý josparyn bir apta boıy daıyndadyq. Sebebi naqty sheshim bolǵan joq. Sońǵy ýaqytqa deıin Qytaı ózge elderge áýe keńistigin paıdalanýǵa ruqsat bermedi», dedi Ýhannan kelgen qazaqstandyq stýdent. Ol aýrýhanada jatqan adamdardyń týǵan-týystaryna alańdamaýdy ótinip, barlyǵynyń jaǵdaıy jaqsy ekenin aıtty. «Uzaq ýaqyt Qytaıda bolǵan balalar óz nómirlerin tirkep úlgermedi jáne Qazaqstanǵa kelgennen keıin olardyń nómiri óship tur. Ata-analary evakýasııalaý josparyna saı Qazaqstanǵa kelgenimizdi biledi. Biraq kim qaı palatada ekenin bilmeımiz», dedi stýdent qyz.
Sóz sońynda ol qoldaý kórsetken Memleket basshysyna jáne otandastaryna rızashylyǵyn bildirdi. «Qurmetti Qazaqstan halqy! Biz barlyǵymyz Otanymyzǵa oraldyq jáne dárigerlerdiń turaqty baqylaýyndamyz. Bizde bári jaqsy. Biz úshin shyn nıetimen alańdaýshylyq tanytqan barlyǵyńyzǵa rahmet», dedi ol.
