Sıfrlyq damý, ınnovasııalar jáne aeroǵarysh ónerkásibi mınıstri A. Jumaǵalıev 2019 jyly «Sıfrlyq Qazaqstan» memlekettik baǵdarlamasyn iske asyrýǵa 18,7 mlrd teńge bólingenin, ol tolyǵymen ıgerilgenin málimdedi.
2018-2019 jyldary sıfrlandyrý boıynsha júzege asyrylǵan is-sharalar 802,5 mlrd teńge kóleminde ekonomıkalyq tıimdilik ákeldi, ınnovasııalyq ekojúıege 32,8 mlrd teńge tartyldy jáne irgeles salalardy eskere otyryp, 120 myń jumys orny quryldy.
«Elbasy Nursultan Ábishuly Nazarbaev pen Memleket basshysy Qasym-Jomart Kemeluly Toqaev sıfrlandyrýǵa erekshe kóńil bóledi. Úkimettiń keńeıtilgen otyrysynda Memleket basshysy sıfrlandyrý salasyndaǵy jumystyń mańyzdylyǵyn atap ótip, bul baǵytty naqty túpkilikti nátıjege qol jetkizýmen jedeldetýdi tapsyrdy», dedi A. Mamın.
Premer-Mınıstr 2019 jyly memlekettik organdardyń aqparattyq júıelerin ıntegrasııalaý josparynyń oryndalmaýyna Ishki ister, Densaýlyq saqtaý, Indýstrııa, Ulttyq ekonomıka jáne Qorǵanys mınıstrlikteri jol bergenin atap ótti.
«Bul jumysty erekshe baqylaýǵa alyp, ony 1 naýryzǵa deıin aıaqtaý qajet. Barlyq memlekettik organdardyń basshylary aqparattyq júıelerdiń ýaqytyly birigýi men olardyń úzdiksiz jumys isteýi úshin derbes jaýapty orynbasardy bekitýi tıis» dedi A. Mamın.
Premer-Mınıstr bıyl memlekettik qyzmetterdi avtomattandyrýdyń 90% deńgeıine jetýdi tapsyrdy. Memlekettik organdar qysqa merzim ishinde memlekettik qyzmetter tizilimine qajetti ózgeristerdi, onyń ishinde 20 memlekettik qoldaý sharalary boıynsha ózgeristerdi pysyqtap, engizýi qajet.
Úkimet basshysy halyqty joǵary jyldamdyqty ınternetpen qamtamasyz etý jumysynyń uzaqqa sozylyp ketkenin atap ótti.
Nur Otan partııasynyń 250 adamnan asatyn halqy bar eldi mekenderdi joǵary jyldamdyqty ınternetpen qamtamasyz etý jónindegi saılaýaldy baǵdarlamasynyń is-sharalaryn iske asyrý aıasynda baılanys operatorlarymen jumys kestesi áli kúnge deıin bekitilmegen. Partııa ókilderi men Parlament depýtattary tarapynan bul másele boıynsha syn da aıtyldy», dep A. Mamın, atalǵan máseleni bir apta merzim ishinde sheshýdi tapsyrdy.
Premer-Mınıstr Sıfrlyq damý, ınnovasııalar jáne aeroǵarysh ónerkásibi mınıstrligine Bilim jáne ǵylym mınıstrligimen birlesip, úzdik halyqaralyq tájirıbelerdi paıdalana otyryp, AT-mamandaryn sapaly daıarlaý jónindegi jumysty jandandyrýdy tapsyrdy.
