«Sıfrlyq Qazaqstan» baǵdarlamasynyń birinshi baǵyty — adamı kapıtaldy damytý boıynsha búginde belgili bir jetistikterge qol jetkizilgen.
Elimizdiń barlyq mektepteri kompıýtermen jabdyqtalǵan. Mektepterdiń 93%-y ınternet jelisine qosylǵan.
Joǵary bilim berýde 2019-2020 oqý jylyna AKT baǵyty boıynsha 19 myńǵa jýyq grant bólindi.
Budan ózge, 2019 jyly Astana Hub bazasynda Alem-i baǵdarlamalaý mektebi jáne Astana IT Ýnıversıteti ashyldy. Ol jerde jańa býyn mamandary daıyndalady.
Sondaı-aq halyqtyń sıfrlyq saýatyn ashý kýrstary turaqty túrde ótkizilýde. Sonyń nátıjesinde sıfrlyq saýattylyq deńgeıi 79%-dan asty.
2020 jyldan bastap baǵdarlamalaý negizderin oqytý 1-synyptan bastap engiziledi. Almaty qalasynda ekinshi Alem-i baǵdarlamalaý mektebin jáne AHQO bazasynda Nur-Sultanda QWASAR baǵdarlamalaý mektebin ashý josparlanǵan. Osylaısha, halyqtyń sıfrlyq saýattylyq deńgeıin 80%-ǵa deıin jetkizý kózdelgen.
Sondaı-aq A. Jumaǵalıev atap ótkendeı, densaýlyq saqtaýdy sıfrlandyrý salasynda aýqymdy jumystar atqarylýda, oń nátıjeler bar. Búgingi tańda emdelýshiler jáne dárigerlerdiń ýaqyty 50%-ǵa únemdeldi.
Jalpy, dári-dármek salasynda sıfrlandyrý esebinen 23 mlrd teńgege jýyq tıimdilik belgilengen.
Osy jyly aýdandyq deńgeıge deıin emhanalardy kompıýtermen 100% qamtý josparda bar. Al medısınalyq mekemelerdi aqparattyq júıelerge qosý 93%-ǵa jetedi.
