Aýyspaly tartý kúshimen basqarylatyn aınymaly-turaqty toktyń elektr berilisi bar eki seksııaly 2TE25KM magıstraldyq júk teplovozy bir mezette salmaǵy 4000 tonnadan asatyn 40 vagonnan astam shıki kendi tasymaldaı alady. Onyń qýaty 7 200 at kúshine teń.
«Qazir jańa tehnıkany iske qosý jumystary aıaqtalýǵa jaqyn. Sonymen qatar tórt lokomotıv brıgadasy jabdyqtardy basqarýdy oqyp, úırendi. Qyzmetkerler nemistiń «Haısman» basqarý júıesin ıgerip jatyr. Jańa teplovoz shıki kendi Qashar alańyndaǵy «Qaıta júkteý» beketinen Rýdnyıdaǵy «Tas usaqtaý» beketine tasymaldaıtyn bolady» dedi SSKО́B Qashar taý-ken óndirý kesheniniń teplovoz jáne temirjol kranyn paıdalaný ýchaskesiniń basshysy Nurlash Begdaýtov.
2TE25KM magıstraldy teplovozynyń jumysy birlestiktiń temirjol ınfraqurylymyn paıdalaný tıimdiligin arttyrady, júkterdi jetkizý ýaqytyn qysqartady.
«Men 10 jyldaı lokomotıv mashınısi bolyp jumys istep kelemin. Sonda da búginde lokomotıv basqarýdy qaıta oqý kerektigi esh qorqytpaıdy. Negizgi artyqshylyq – qazirgi zamanǵy tehnologııalar. Bul degenimiz, jańa tehnologııalar eskige «saý bolyńyz» dep qol bulǵap tur» dedi Qashar taý-ken óndirý kesheniniń teplovoz jáne temirjol kranyn paıdalaný ýchaskesiniń teplovoz mashınısi Andreı Dzıadzın.
Bıyl Rýdnyıǵa TEM18DM serııaly jańa manevrlik teplovoz da satyp alynatyn bolady.
RÝDNYI
