Fýtboldan Qaraǵandynyń «Shahter» komandasy Tırana qalasynda Albanııanyń «Skenderbeý» klýbymen ótken kezdesýde eki oıynnyń nátıjesi boıynsha Chempıondar lıgasynyń pleı-off kezeńine shyqty.
Fýtboldan Qaraǵandynyń «Shahter» komandasy Tırana qalasynda Albanııanyń «Skenderbeý» klýbymen ótken kezdesýde eki oıynnyń nátıjesi boıynsha Chempıondar lıgasynyń pleı-off kezeńine shyqty.
Bul kezdesýde áýeli Sergeı Hıjnıchenkonyń esepti ashýǵa múmkindigi bolǵan. Ol alańnyń ortasynan ádemi shyǵarylǵan pasty utymdy paıdalansa da, sol qaptaldan jalǵyz ózi qaqpashymen birde-birge shyǵyp, dop soǵý múmkindigin jiberip aldy. Dop qaqpanyń sol jaq buryshynyń janynan ótip, qıys ketti. Osydan keıin alań ıeleri shabýyldy údete túsip, birinshi taımda úsh gol saldy. Aldymen, 9-mınýtta Tomıch esep ashty. Ol «Shahterdiń» aıyp alańynda qorǵaýshylardyń bir-birin túsinbeýshiligin paıdalanyp, bar-joǵy bir metrden gol soqty. Osy oıynda Kýmykovtyń bir qateligi, birinshi taımda bes birdeı qorǵaýshyny alańǵa shyǵarǵandyǵy dep oılaımyz. Osynyń kesirinen albandar shabýyldy jıilete túsip, Mokınniń qaqpasyna qaýipti jaǵdaılardy birinen soń birin týǵyzyp otyrdy. Qaqpany alystan da, jaqynnan da kózdedi. Sondaı sátterdiń birinde alań ıeleri aıyp dop alańynda eki ret qulap, penaltı soǵýǵa múmkindik aldy. Albandardyń shabýylshysy Shkembı bul eki múmkindikti de 20 jáne 29-mınýttarda jibergen joq. Esep – 0:3.
Osydan soń «Shahter» esin jıyp, qarymta shabýyldarǵa shyǵyp, birinshi taımnyń sońynda esepti qysqartty. Bizdiń jaqtan goldy Sergeı Hıjnıchenko soqty. Al ekinshi taımda Malyıdyń ornyna alańǵa shyqqan Maqsat Baıjanov ózine kelgen múmkindikti múlt jibergen joq. Osylaısha bizdiń oıynshylar syrt alańda jeńilgenimen, kelesi kezeńge ótýge múmkindik aldy. Qorytyndy esep – 3:2. Alda ne bolady, ony endi ýaqyt kórsetedi.
Dastan KENJALIN,
«Egemen Qazaqstan».
