Qoǵam • 07 Aqpan, 2020

«Shahrıstanǵa» saıahat

67 retkórsetildi

Jambyl oblysy ótken jyly óziniń 80 jyl­dyq torqaly toıyn atap ótti. Osy mereı­toıǵa oraılastyrylyp kıeli Jambyl jerinde birqatar jańa nysan boı kóterdi. Solardyń biri ári biregeıi «Shahrıstan» etno-kesheni jýyqta paıdalanýǵa berilip, mundaǵy «Kórkemdik beıneleý óneri» galereıasy, «Rýhanııat» ortalyǵy, oblystyq ólketaný murajaıy, saǵat stellalary alystan menmundalap, kópshiliktiń súıikti mádenı demalys ornyna aınalyp otyr.

Kórse kóz qyzyǵatyn osynaý nysandarǵa Elbasynyń «Bolashaqqa baǵdar: rýhanı jańǵyrý» maqalasynyń «Qazaqstannyń kıeli jerleriniń geografııasy» jobasy aıasynda Baızaq aýdandyq tarıhı-ólketaný mýzeıi qyzmetkerleri men N.Kıikbaev atyndaǵy mektep-gımnazııa oqýshylary arnaıy baryp, ekskýrsııa jasady.

 Biz úshin mundaǵy ǵasyrlar tarıhynan syr shertetin, 65 myńnan astam jádigeri bar Jambyl oblystyq mýzeı úıi erekshe áser qaldyrdy.

Murajaıdaǵy tarıhı jádigerler «Tarıhq­a deıingi kezeń», «Taraz qalasynyń tarıhy», «Qazaq halqynyń etnografııasy», «Áýlıe ata kezeńi» syndy zaldarda toptastyrylyp qoıylǵan eken. О́ńirimizdiń ótken ómirinen syr shertetin osynaý tarıhı qundylyqtardyń deregimen bizdi oblystyq mýzeıdiń qyzmetkeri Gúlnaz Kólbaeva tanys­tyryp, jastardyń qyzyqtyrǵan saýaldaryna jaýap berdi.

Osy rette aýdandaǵy N.Kıikbaev atyn­­­­­daǵy mektep-gımnazııanyń tálimgeri Anar Baısultanova: «Kıeli Jambyl jeri kún­nen-kúnge kórkeıip keledi. Ásirese obly­symyz sońǵy kezderi tarıhı oryndarmen toly­ǵa túsýde. «Shahrıstan» etno-ke­she­nin kórý kópten beri oıymyzda júrgen. Oqý­shylarymyz mýzeı úıin aralap kórip,  ótken tarıhymyz týraly tolyq maǵulmat aldy», deıdi.

Shyndyǵynda da shyǵys úlgisinde salynǵan keshenniń kórki aıryqsha qyzyǵarlyqtaı. Ásirese eki myń jyldan asa tarıhy bar Taraz topyraǵynan tabylǵan qazba baılyqtar kóne dáýirimizden syr shertip, jas urpaqqa ata-baba murasyn uǵyndyrýǵa sebepker bolýda.

 

Aınagúl MAMYTBEKOVA,

Baızaq aýdandyq tarıhı-ólketaný mýzeıiniń ǵylymı qyzmetkeri

 

Jambyl oblysy

 

Sońǵy jańalyqtar

Ystyq tamaq taratty

Qazaqstan • Keshe

Betperde kıgen kóktem

Tanym • Keshe

Uqsas jańalyqtar