Volonterlik – óz erkińmen, shynaıy júrek qalaýymen atqarylatyn jumys. Bul – adamgershilik pen parasattylyqtyń aıqyn kórinisi. Búginde álem boıynsha júz mıllıonnan astam adam osynaý ıgi ispen aınalysady. Elimizde 580-nen astam volonterlik uıymdar iri qalalar men aýyldarda belsendi jumys atqarýda.
«Eriktiler jyly» men irgeli oqý ordasynyń 90 jyldyq mereıtoıyna oraılastyrylǵan forýmǵa Ońtústik Koreıa, Fransııa, Reseı, О́zbekstan, Qyrǵyzstan elderiniń arnaıy delegattary, Qazaqstandaǵy sheteldik Konsýldyqtar men Elshilik qyzmetkerleri, Memlekettik qyzmet isteri jáne sybaılas jemqorlyqqa qarsy is-qımyl agenttiginiń ókilderi, «Nur Otan» partııasy jáne «Jas Otan» jastar qanatynyń belsendileri, Respýblıkalyq «Sanaly urpaq» jobalyq keńsesiniń, sondaı-aq «Izgilik Elshisi» jobasynyń úılestirýshileri jáne basqa da qonaqtar qatysty.
Forým jumysyn ashqan QazUAÝ rektory Tilektes Espolov: «Jumyla kótergen júk jeńil» degen ustanymdy tý etken ata-babalarymyz «Bir jaǵadan bas, bir jeńnen qol shyǵaryp», bir-birine kómektesip, Asar jasap, bir otbasynyń emes, tutas bir aýyldyń eńsesin kóterip tastaıtyn. Búgingi volonterlik qyzmettiń qaǵıdasy da osyndaı izgi nıetterden bastaý alady», – degen oı-tujyrymymen bólisti.
Ýnıversıtet basshysy, tilge tıek etkendeı atalǵan basqosýdyń maqsaty – jastardyń boıynda parasattylyq, adaldyq mádenıetin qalyptastyrý, olardy izgilikke, adamgershilikke, baýyrmaldylyqqa baýlý.
Stýdentterdi yntymaqtasa otyryp, izgilik jasaýǵa uıystyratyn sý jańa «Eriktiler ortalyǵy» naqty jospar boıynsha jumys jasamaq. Atap aıtqanda, ortalyq qyzmeti arqyly jastar Prezıdent anyqtaǵan «Eriktiler jylynyń» «Sabaqtastyq», «Saýlyq», «Taza álem», «Asyl Mura», «Qamqor», «Bilim», «Úmit» dep atalatyn 7 baǵyty boıynsha volonterlyq is josparlaryn júzege asyratyn bolady. Sonymen qatar osy ortalyqta bilikti, tájirıbeli mamandardy tartý arqyly jastardy volonterlyq qyzmet boıynsha oqytyp, daıyndaıtyn, olarǵa baǵyt-baǵdar beretin arnaıy shtab qurylady. Onda jastar ózderi qoǵamdaǵy áleýmettik máselelerdi taldap, kimge qandaı kómek kerek ekenin anyqtap, naqty sheshimder qabyldaıdy.
Forým jumysy aıasynda Ońtústik Koreıalyq IMEI Halyqaralyq mentaldy-aǵartýshylyq ortalyǵynyń basshysy, professor Djo Gıý Iýn bastaǵan ǵalymdar jastarǵa volonterlyqty damytýǵa baılanysty arnaıy semınar-trenıng ótkizdi. Erkin pikir almasý formatynda ótken basqosýda QazUAÝ bilim alýshylarynyń volonterlik baǵytta atqarǵan qaıyrymdy is-sharalary týraly beınerolık pen shákirtterdiń ózderi daıyndaǵan izgilikke úndeıtin mýltfılm kórsetilip, oqý ornyndaǵy Stýdentter úıinde turatyn jastarmen onlaın baılanys ornatyldy.
Forýmda sóz sóılegen erikti jastar bul bastamalaryn respýblıkamyzdyń basqa da joǵary oqý oryndaryna joldap, «Eriktiler jylynda» ıgi isterdi birlese atqarýǵa shaqyrdy.
