Úkimet • 10 Aqpan, 2020

Jalǵan aqparat taratqandar jazasyz qalmaıdy

46 retkórsetildi

7 aqpan kúni Jambyl oblysy Qordaı aýdanynda bolǵan jaǵdaıdan keıin el arasynda túrli áńgimeler kóbeıip, áleýmettik jeli, uıaly telefondar arqyly adam júregin shoshytatyn vıdeolar taraı bastaǵany belgili. Osyǵan baılanys­ty senbi kúni Ortalyq kommýnıkasııalar qyzmetinde ótken brıfıngte Ishki ister mınıstri Erlan Turǵymbaev, Aqparat jáne qoǵamdyq damý mınıstri Dáýren Abaev jáne Bas prokýrordyń orynbasary Bolat Dembaev jurtty sabyrǵa shaqyryp, Qordaı aýdanyndaǵy jaǵdaı jaıynda naqty málimetter berdi.

Ishki ister mınıstri Erlan Turǵym­baevtyń aıtýyna qaraǵanda Qordaı aýdany, Masanchı jáne Sortóbe aýyl­daryndaǵy oqıǵa týraly alǵashqy habar Jambyl oblysy Polısııa depar­tamentiniń kezekshi bólimine 7 aqpan kúni keshki saǵat 19:00-de túsken. «Sol kúni Masanchı aýylynyń shetinde 70-ke jýyq narazy turǵyn jınalyp, olardyń arasynda buzaqylyq nıetpen toptyq urys bastaldy. Oqıǵa ornyna qordaılyq ishki ister bóliminiń qyzmetkerleri keldi. Arandatýshylar men oqıǵa kýágerleri bolǵan jaıtty vıdeoǵa túsirip, messendjerler men áleýmettik jeli arqyly turǵyndardy zańsyz áreketterge shaqyrǵan. Bul qaqtyǵystyń shıelenisýine jáne toptyq urysqa qatysýshylar sanynyń kóbeıýine ákeldi. Nátıjesinde, kórshi eldi mekenderden 300-ge jýyq adam keldi» dedi bul jóninde E.Turǵymbaev.

Osydan keıin Masanchı aýylyna qo­ǵamdyq tártipti qamtamasyz etý úshin qosymsha polısııa jasaqtary jiberilgen.

«Janjalǵa qatysýshylar polısııaǵa belsendi qarsylyq kórsetip, olardyń zańdy talaptaryn dóreki túrde oryn­damaǵan. Buzaqylar metall zattardy, tastardy, atys qarýlaryn qoldanǵan. Keıinirek Aýqatty jáne Bulan batyr aýyl­darynda da qaqtyǵystar oryn aldy. Eldi mekender men joldarǵa kiretin perımetrdiń aınalasyndaǵy joldarǵa bógetter qoıyldy», dedi mınıstr.

Ishki ister mınıstri Erlan Turǵym­baev Jambyl oblysynda bolǵan qaq­tyǵysta 8 adam qaıtys bolǵanyn aıtty. Aldyn ala derekter boıynsha órtpen ushtasqan buzaqylyqtyń saldarynan 30-dan astam jeke úı, 15 saýda nysany jáne 23 avtokólik zaqymdaldy. Jedel tergeý toby quryldy. Oqıǵa ornyna Ishki ister mınıstriniń orynbasary men Bas prokýrordyń birinshi orynbasary shyqty. Quqyq tártibi kúshterimen qaqtyǵys toqtatyldy. 47 adam ustaldy jáne polısııa bólimine jetkizildi, eki ańshy myltyǵy tárkilendi. Sotqa deıingi tergeý Qylmystyq kodekstiń 272-baby «Jappaı tártipsizdikti uıym­dastyrý jáne oǵan qatysý», sondaı-aq 99-baby «Adam óltirý» boıynsha júrgiziledi. Qoǵamdyq tártipti buzǵan kinálilerdiń barlyǵy zańnamaǵa sáıkes jaýapkershilikke tartylady. Qazirgi ýaqytta qoǵamdyq qaýipsizdikti qam­ta­masyz etý úshin qaqtyǵys aıma­ǵyna polısııa qyzmetkerleri men Ult­tyq ulannyń áskerı qyzmetshileri ornalas­qan. Qordaı aýdanyndaǵy jaǵdaı turaqtandy.

Brıfıngte Aqparat jáne qoǵamdyq damý mınıstri Dáýren Abaev osy oqıǵa­ǵa baılanysty azamattardy sabyr saqtap, arandatýǵa ermeýge, jalǵan aqparat taratpaýǵa shaqyrdy. Memle­keti­mizdiń múddesine zııan keltiretin, bereke-birligimizdi buzatyn jáne jalǵan aqparat taratqan azamattar zań aldynda jaýap beredi. «Qazaqstan Konstıtýsııasy ultaralyq kelisimdi buzatyn kez kelgen áreketke tyıym salady. Bul talapty oryndamaǵandar ulttyq arazdyq týdyrǵany úshin, jappaı tártipsizdik uıymdastyryp, jalǵan aqparat taratqany úshin qylmystyq jaýapkershilikke tartylady. Tergeý nátıjelerine qatysty barlyq málimetti IIM men Bas prokýratýra habarlaıdy. Quqyq qorǵaý organdary kez kelgen quqyq buzýshylyqtyń jolyn kesip, olarǵa jol bermeý úshin qajetti barlyq sharany qabyldaıdy», dedi bul jóninde Bas prokýrordyń orynbasary Bolat Dembaev.

Memleket basshysy Qasym-Jomart Toqaev Jambyl oblysyndaǵy oqıǵa­larǵa baılanysty málimdeme jasap, Úkimet komıssııasyn qurýdy tapsyrǵan bolatyn. Oǵan Premer-Mınıstrdiń oryn­basary Berdibek Máshbekuly Sapar­baev tóraǵalyq etip, Úkimet komıssııa­sy bolǵan oqıǵanyń sebebin anyqtaýda.

Árıne Qordaıdaǵy oqıǵanyń qalaı tutanǵany týraly el ishinde túrli áńgimeler aıtylýda. WhatsApp jelisi arqyly taraǵan vıdeolarǵa qaraǵanda jappaı tóbeles Sortóbe jáne Masanchı aýyldarynyń adamdary polıseılerge qarsylyq kórsetip, jaǵasynan ala túsýinen bastalǵan sııaqty. Al endi bir áńgi­melerde bir top dúngen qazaq aza­maty men onyń balasyna balta alyp umtylǵany da aıtylady. Aqparat jáne qoǵamdyq damý mınıstri Dáýren Abaev brıfıngten keıin tilshilerdiń suraq­taryna jaýap berý kezinde «adamdy baltalap tastaǵan» degen aqparatty joqqa shyǵardy.

«Adamdy baltalap tastaǵan degen aqparat jalǵan. Mundaı nusqa bar. Bul turmystyq janjal, biraq naqty qandaı ekenin, qalaı bolǵanyn anyqtap jatyr», dedi D.Abaev. Qordaıda oryn alǵan oqıǵanyń erteńinde Almatydaǵy «Baısat», «Barlyq», «Iаlıan», «Rahat», «Barys», «Alataý», «Bolashaq», «Mızam», «Arlan», «О́jet», «Aq bulaq», «Ken­je­han» bazarlary sanıtarlyq kún jarııa­lanǵandyqtan jumysyn toqtatqan bolatyn. Mınıstr bul jaıtqa qatysty da pikir bildirdi.

«Sizder bul máselege túsinistikpen qaraýlaryńyz kerek. Sebebi «Baraholka» bazarynda qaqtyǵys jasaýǵa úndeý jasalǵan. Osyǵan sáıkes saqtyq sharalary kúsheıtildi», dedi Dáýren Abaev.

Al jeksenbi kúni Ortalyq kommýnıkasııalar qyzmetinde ótken brıfıngte Ishki ister mınıstriniń orynbasary Alekseı Kalaıchıdı men Densaýlyq saqtaý vıse-mınıstri Lázzat Aqtaeva Qordaı aýdanyndaǵy jaǵdaıdan taǵy da málimetter berdi. Mınıstrdiń orynbasary A.Kalaıchıdı tóbeles saldarynan qaıtys bolǵandardyń sany onǵa jetkenin aıtty. Odan bólek 43 adam jaraqat alǵan, onyń 39-y aýrýhanada jatyr. Jaraqat alǵandardyń ishinde 5 polısııa qyzmetkeri bar. Onyń úsheýine oq tıgen. Alaıda bul qaqtyǵysta polısııa qarý qoldanbaǵan. Sondaı-aq, órt saldarynan 25 turǵyn úı, 31 kommersııalyq nysan, 41 kólik zaqymdandy. Ázirge 2 ańshy myltyǵy, 2 tapansha jáne 50 janarmaı toltyrylǵan bótelke tárkilengen.

– 9 aqpan kúngi saǵat 11-ge deıingi málimetterge qaraǵanda Qordaı aýdanynda bolǵan tóbelesten 165 adam zardap shekti. Onyń ishinde Qazaqstandaǵy emdeý oryndarynyń kómegine 140 adam júginse, Qyrǵyzstandaǵy emdeý oryndaryna 25 adam qaralypty. Jalpy alǵanda 50 adam aýrýhanaǵa jatqyzyldy. Onyń 40-y qazaqstandyq aýrýhanalarǵa, 10-y qyrǵyz eliniń emdeý oryndaryna jatqyzyldy. 30 naýqastyń jaǵdaıy aýyr, odan bólek reanımasııa bóliminde jatqan 8 naýqastyń jaǵdaıy tipten aýyr. Oqıǵa kezinde 8 adam qaıtys bolǵan, taǵy eki adam aýrýhanada jatyp qaıtys boldy. Jedel járdem qyzmetiniń 14 brıgadasy jumys isteýde. Sanavıasııa qyzmeti arqyly 2 naýqas tikushaqpen Almatyǵa jetkizilip, sol qaladaǵy emdeý oryndaryna jatqyzyldy, dedi Densaýlyq saqtaý mınıstriniń orynbasary Lázzat Aqtaeva brıfıngte.

Sońǵy jańalyqtar

Abaı murasyna arnalǵan kórme

Rýhanııat • Keshe

Jaǵa ustatqan jat qylyq

Aımaqtar • Keshe

Uqsas jańalyqtar