Árıne jabdyq qanshalyqty jetildirilse de onymen adam jumys isteıdi. Demek, dertke dármen tabylýy sol qymbat qurylǵynyń «tilin tabatyn» dárigerdiń biliktiligine baılanysty. Qazaly aýrýhanasynyń kardıologııalyq ortalyǵyndaǵy dáriger-neırohırýrg Kenesary Baspaev pen onyń áriptesi Aıan Qazıuly A.N.Syzǵanov atyndaǵy ulttyq hırýrgııa ǵylymı ortalyǵynyń qaıta daıarlaý kýrstarynan ótip, bilimderin jetildirgen, oblystyq medısına ortalyǵynda tájirıbelerin tolyqtyrǵan.
– Qazir osy aýrýhana bazasynda júrekke ota jasap jatyrmyz. Negizi koronarografııanyń basty maqsaty – aýrýdy erte anyqtaý. Osy ortalyq ashylǵan byltyrǵy kúzden beri 100-den astam ota jasadyq. Naýqastar otadan keıin osyndaǵy 15 tósektik kardıologııalyq bólimde jatyp em alady, – deıdi dáriger-neırohırýrg Kenesary Baspaev.
Aýdandyq aýrýhana osy ortalyqty ashýǵa 3 jyldaı daıyndalypty. Eń áýeli mundaǵy dárigerlerdiń memleket tarapynan tegin beriletin áseri kúshti «Aktıvızıe» preparatyn tıimdi paıdalanǵany eskerilgen. Sol tusta oblysty basqarǵan Qyrymbek Kósherbaevtyń bastamasymen aýdandarda medısınalyq klasterler qurý máselesi kóterilgen kezde Qazaly kardıologııalyq ortalyq bolýǵa laıyq dep tanylǵan. Osynyń nátıjesinde qazir oblys ortalyǵynan shalǵaı jatqan aýdandaǵy naýqastar em izdep alysqa sabylmaıdy. Kardıoortalyq Qazalymen qatar Aral, Qarmaqshy aýdandary, Baıqońyr qalasy turǵyndary úshin qyzmet kórsetedi. Jalpy, shalǵaı aýdandarda medısınalyq klaster qurý ıdeıasy ıgilikti is. Mysaly, Qazalyǵa kórshiles Aral aýdanynda akýsherlik ortalyq ashylypty. Jaqyn aýdandardaǵy naýqastardyń bári sonda baryp qaralady.
– Jańaǵy aıtqan «Aktıvızıe» preparatynyń qan tamyrlarynyń bitelgen tustaryn ydyratyp, aýrýdy boldyrmaýǵa tıgizer septigi kóp. Biraq, keri áseri de joq emes. Qazir «Angıograf» arqyly naýqasty tolyq zerttep alýǵa múmkindik týyp otyr. Keıde oǵan preparat salýdyń qajeti bolmaı, emniń basqa túri jasalady. Dári egilgende de osy apparat arqyly onyń aýrýǵa áserin kórip otyramyz, – deıdi bas dárigerdiń orynbasary Baqytgúl Álisheva.
Dárigerlerdiń aıtýynsha, ınfarkt alǵan naýqasqa 3-6 saǵat aralyǵynda jasalǵan em jaqsy darıdy. «Angıograf» apparaty arqyly aıyǵyp ketip jatqandar osynyń dáleli. Eń bastysy, qurylǵy qazalylyq kardıologtardyń ózderine degen senimin qalyptastyrdy. Byltyr otanyń 4 túrin jasaǵan dárigerler alda basqa da kúrdeli operasııalardy qolǵa almaq.
QYZYLORDA
