Keshe Syrtqy ister mınıstrliginiń baspasóz hatshysy Nurjan Aıtmahanovtyń qatysýymen atalǵan vedomstvonyń dástúrli brıfıngi ótti. Onda eki másele tóńireginde áńgime qozǵaldy.
Keshe Syrtqy ister mınıstrliginiń baspasóz hatshysy Nurjan Aıtmahanovtyń qatysýymen atalǵan vedomstvonyń dástúrli brıfıngi ótti. Onda eki másele tóńireginde áńgime qozǵaldy.
«Qazaqstan Respýblıkasynyń Nıý-Iorktegi Bas konsýldyǵynan kelip túsken aqparatqa sáıkes, 2013 jylǵy 8 tamyzda Massachýsets shtatynyń Vorchester joǵarǵy soty Qazaqstannan asyrap alynǵan eki balaǵa qarsy jynystyq sıpattaǵy qylmystyń kóptegen tarmaqtary boıynsha aıyptalýshy Djozef jáne Lında Meıotty kináli dep tanydy», dedi alǵashqy másele tóńireginde baspasóz hatshysy. Onyń aıtýynsha, qazirgi ýaqytta D. Meıott tutqyndalǵan, al onyń zaıyby aýrýhanadan shyqqannan keıin tutqyndalmaq.
«Sottyń úkim shyǵarý kúni 22 tamyzǵa belgilengen. Bul másele QR SIM-niń qatań baqylaýynda tur. Jańa málimet kelip túsken jaǵdaıda, qosymsha habarlaıtyn bolamyz», dedi óz sózinde N.Aıtmahanov.
Brıfıngte kóterilgen ekinshi másele, Qazaqstan Respýblıkasynyń azamattary Azamat Tájaıaqov pen Dıas Qadyrbaevqa qatysty boldy. Baspasóz hatshysynyń aıtýynsha, Qazaqstan Respýblıkasynyń Nıý-Iorktegi Bas konsýldyǵynyń aqparatyna sáıkes, 2013 jylǵy 8 tamyzda Federaldy Úlken ádilqazy (Grand Jury) qazaqstandyq azamattar Azamat Tájaıaqov pen Dıas Qadyrbaevqa qatysty aıyp taǵýdy qoldaǵan. Aıyp eki tarmaqtan turatyn kórinedi. Birinshisi – tergeýge kedergi keltirý maqsaty boıynsha aldyn ala kelisim, ekinshisi – tergeýge kedergi jasaý, qylmyskerge kómek kórsetý jáne arandatýshylyq.
«Atalǵan aıyptar boıynsha olar 25 jyl merzimge bas bostandyǵynan aıyrylýy múmkin (1-tarmaq boıynsha 20 jyl, 2-tarmaq boıynsha 5 jyl). Sonymen qatar, sol jazany ótegennen keıin kezekti 3 jyl baqylaýda bolyp, 250 myń AQSh dollary kóleminde aıyppul jazasy kesilmek. Sot otyrysy 13 tamyzǵa kózdelgen, onda aıyptalýshylar (A.Tájaıaqov pen D.Qadyrbaev) óz kinálaryn moıyndamaı, basqa is-júrgizý formaldylyǵy saqtalatyn bolady dep kútilýde. Aıyptalýshylar óz kinálaryn moıyndamaǵannan soń, sot úderisi barlyq jaǵdaılarmen tanysý fazasyna jáne jekelegen dálelder boıynsha narazylyq bildirýge kóshetin bolady. Atalǵan úderis dástúr boıynsha aıtarlyqtaı uzaq ýaqytty talap etedi, sondyqtan belgisiz ýaqytqa sozylýy múmkin ekendigin atap ótkimiz keledi», dedi N.Aıtmahanov.
Baspasóz hatshysy, sondaı-aq, elimizdiń Syrtqy ister mınıstrligi bul máseleni baqylaýda ustap otyrǵanyna, Bas konsýldyqtyń qyzmetkerleri bizdiń azamattarymyzdyń ata-analarymen jáne advokattarymen turaqty túrde baılanysta ekenine toqtalyp ótti.
Láıla EDILQYZY,
«Egemen Qazaqstan».
