Kachar kentinde jańa meshit ashyldy. Bul osyndaǵy musylman jurtynyń qýanyshyna aınaldy. 100 orynǵa arnalǵan ǵımarattyń ishimen qatar, syrty da sulýlyǵymen kóz tartady.
Kachar kentinde jańa meshit ashyldy. Bul osyndaǵy musylman jurtynyń qýanyshyna aınaldy. 100 orynǵa arnalǵan ǵımarattyń ishimen qatar, syrty da sulýlyǵymen kóz tartady. «Arhıdızaın 2008» jaýapkershiligi shekteýli seriktestiginiń qurylysshylary men sáýletshileri shaǵyn meshittiń syrtqy kórkimen qatar, oǵan qoldanǵan materıaldardyń sýyqqa beriktigine de mán beripti. Mysaly, meshittiń kúmbezi farformen jabylǵan. Qurylysshy mamandardyń aıtýynsha, elimizdegi farfor kúmbezdi birinshi meshit te osy kórinedi. Ol Arqa jeriniń qary men jeline, jańbyryna tózimdi keledi. Sonymen birge, meshittiń ishi de farformen bezendirilgen.
– Ǵımarattyń ishin qolónershiler shyǵarmashylyqpen jasady. Quran súreleri qabyrǵalarǵa oıyp jazyldy, qazaqtyń oıýlary da umyt qalǵan joq. Olar qaıta úndesip turǵandaı. Meshitti salý barysynda ıslam qaǵıdattarynyń barlyq erejeleri eskerilip otyrdy, – deıdi dızaıner Taıyr Baltabaev. Meshittiń birinshi qabatynda erlerge, áıelderge arnalǵan namaz oryndary jáne ımamnyń bólmesi ornalasqan. Ǵımarat zalyna salmaǵy 300 kılogramdyq aspa sham ilingen.
Meshit ENRC korporasııasy men Qostanaı oblysy ákimdiginiń arasyndaǵy áleýmettik áriptestik memorandýmy sheńberinde salyndy. Imandylyq úıi Sokolov-Sarybaı ken óndirý birlestigine 40 mıllıon teńgege tústi.
Názıra JÁRIMBETOVA,
«Egemen Qazaqstan».
QOSTANAI.
