Osy kúnderi AQSh-tyń Maıamı qalasynda dzıýdodan kadetter arasynda ótip jatqan álem chempıonatynda 55 kıloǵa deıingi salmaqta Baýyrjan Jaýyntaev (sýrette soldan sanaǵanda ekinshi) altyn medaldi jeńip aldy.
Baýyrjan álemdik dodanyń qurmet tuǵyryna kóterilgen alǵashqy qazaqstandyq kadet boldy. Birinshi jekpe-jekte ol tóreshiden bir eskertý alyp, perýlik Patıno Vılagrany jeńse, kelesisinde birinshi mınýtta-aq ýkraınalyq Karo Marandıandi taza ádispen túsirip, tize búktirdi. Baýyrjan shırek fınalda amerıkalyq Adonıs Dıas pen grýzın Erekle Arhozashvılıdi ıpponmen utty.
Bizdiń balýan úshin eń qıyn kúres 2011 jylǵy kadetter arasyndaǵy álem chempıonatynda kúmis júlde utyp alǵan ıtalıan Elıos Manzımen boldy. Bul kezdesýde berilgen tórt mınýtta aıtarlyqtaı basymdyq tanyta almaǵan, eki sportshy tóreshiden eskertý alyp, beldesýdi golden score qosymsha ýaqytta jalǵastyrdy. Osy kezde 44 sekýndta Manzı ekinshi «shıdo» alǵan soń, jekpe-jektiń taǵdyry Baýyrjannyń paıdasyna sheshildi.
Chempıonattyń birinshi kúngi qorytyndysy boıynsha qazaqstandyqtar taǵy eki salmaq dárejesinde kózge tústi. Qanat Seıilhan 50 kıloǵa deıingi salmaqta jetinshi oryndy, Ádııa Saıyn 40 kıloǵa deıingi salmaqta besinshi oryndy ıelendi.
Álem chempıonaty 11 tamyzǵa deıin sozylady. Oǵan 79 elden 532 sportshy qatysýda.
Keshe 48 jáne 52 kılo salmaqtaǵy qyzdar men 60 jáne 66 kılo salmaqtaǵy jasóspirimder beldesti.
Dastan KENJALIN,
«Egemen Qazaqstan».
