Qoǵam • 12 Aqpan, 2020

Jedel jaýaby joqtyń jedel qımyl jasaýy da kúmándi

22 retkórsetildi

Memlekettik qyzmet tarapynan jasalatyn keıbir shekten shyqqan bıýrokratııalyq kedergiler keıde tótenshe jaǵdaılarǵa qarsy jedel áreket etýge de kedergi keltirip jatady. Sondaı bir kederginiń mysalyn tómende jazyp otyrmyz.

Bıyl qar kóp, sondyqtan qarǵyn sýdyń qateri mol bolýǵa tıisti. Ásirese, Soltústik pen Shyǵys oblystarynda qart kúrt erise sý basý qaýpi zor.  Úkimet te, el de osyǵan alańdaýly. Oblystardaǵy tıisti qyzmetterdiń qarǵynǵa qarsy is áreketterin halyqqa jetkizip, olardyń qobaljymaýyn  oılaǵan «Egemenniń» basshylyǵy da bir betin tutastaı osy máselege arnap, aımaqtardaǵy tilshilerge óz oblystaryndaǵy ahýaldy jazýǵa tyǵyz tapsyrma bergen eken.

Tyǵyz tapsyrma bizge 11 aqpan kúni keshke tústi. Máseleniń mańyzdylyǵyn eskerip, tún bolyp qalǵanyna qaramaı oblystyq Tótenshe jaǵdaılar departamentiniń baspasóz qyzmetindegi burynnan biletin Evgenıı Jýravlevqa vatsappen hat jiberip, istelip jatqan jumystar týraly aqparat berýin ótindim. Obaly ne kerek, ol birden jaýap berip, tańerteń jibereıin dedi. 

Osyǵan qanaǵattanǵan basymyz kúndizgi saǵat on birge deıin habar tostyq. Evgenııden esh habar joq, tym tyrs. Umytyp ketken bolar dep telefon soqsaq, almaıdy, hat jazsaq, jaýap bermeıdi. Amal joq TJ departamenti bastyǵynyń orynbasary Pavel Shılov myrzaǵa habarlassaq, «daıte nam ofısıalnyı zapros» dep bylq-sylq etedi. Ondaı saýaldy men jasaǵansha bir-eki kún, jaýap kelgenshe eki-úsh kún ótpeı me desek, men bir qupııa aqparat surap turǵandaı «ınache ne mogý» dep maıysady...

Mine, jedel áreket etýge tıisti qyzmettiń jedel jaýabynyń túri osyndaı eken. Áreketi qandaı bolaryn bir Alla bilsin... Mundaı qyzmetkerler janashyr bolsa, qazir uıyqtap jatsa túsinde qarǵyn  sýdy kórýge tıisti edi ǵoı...

Tek tús áletine qaraı ǵana E.Jýravlevten habar aldyq. Onyń aıtýyna qaraǵanda ázirge Soltústikte eshqandaı kúrt daıyndyq joq, tek qar shyǵarý jumystary  men tehnıkalardy daıyndaý sharalary ǵana júrgizilip jatyr eken. Sonyń ishine  jedel áreket úshin oblys  aýmaǵynda 484 adam, 155 tehnıka, 8 júzý qural jáne 72 motopompa bar ishki ister organdary arasynan kúshter toby qurylǵan. Al jergilikti atqarýshy organdar tarapynan, aldyn derekter boıynsha, kóktemgi kezeńge jeke quramnan 1619 adam, 1163 tehnıka, onyń ishinde 299 sý sorǵysh tehnıka, 109 aýyr ınjenerlik tehnıka jáne 83 júzý qural, janar-jaǵar maı jáne ınertti materıaldar, qaptar daıyndalypty. Aıta qalarlyq sharanyń qatarynda 6637 áskerı bóliminde tótenshe jaǵdaıdan zardap shekkenderge kómek kórsetý boıynsha sabaqtar ótkizilgen. Sondaı-aq Ulttyq ulannyń kúshteri jedel kómek kórsetý úshin quramynda 60 adam men 4 tehnıka bar kontıngent bólgen. Alaıda, TJ basshylyǵy osynyń bárin jadynda ustap, jarqyratyp aıta almasa, qaǵaz júzindegi aqparlar qanshalyqty áleýetti bolaryna sený ońaı emes.

 

Soltústik Qazaqstan oblysy

Sońǵy jańalyqtar

Beıqamdyqqa jol berilmeýi kerek

Rýhanııat • Keshe

Koronavırýssyz Qostanaı

Aımaqtar • Keshe

Kúrish eksportyna kedergi joq

Aımaqtar • Keshe

Álem únemdele bastady

Álem • Keshe

Uqsas jańalyqtar