Jedel járdem brıgadasy 42 jastaǵy áıel men 15 pen 10 jasar eki qyzyna hımıkalyq zattarmen ýlanǵan degen dıagnoz qoıǵan. О́zderin jaısyz sezingenderi eskerilip, shuǵyl túrde anasyn oblystyq aýrýhanaǵa, al qyzdardy kópbeıindi balalar aýrýhanasyna jetkizgen. Áıelge tıisti medısınalyq kómek kórsetilgen soń, úıine jiberilgen. Abyroı bolǵanda oǵan aýrýhanaǵa jatyp em-dom qabyldaý qajettiligi bolmady. Alaıda eki qyzyn aýrýhanaǵa jatqyzýǵa týra keldi. Kepildendirilgen tegin medısınalyq kómek, donor kómek jáne mindetti áleýmettik medısınalyq saqtandyrý aıasynda barlyq em-dom sharalary uıymdastyryldy. Eki qyzdyń jaǵdaıy turaqty. О́mirlerine tónip turǵan qaýip joq. Eki-úsh kúnde úıine jiberiledi dep kútilýde.
Zardap shegýshi Iýlııa Moldovannyń aıtýynsha, bul jaǵdaı osydan eki kún buryn bolǵan.
- Úıge kelsem, jaǵymsyz ıistiń baryn sezdim, úıde úlken qyzym bar edi, sodan surasam, bul ıistiń paıda bolǵanyna biraz bolǵanyn aıtty. Tótenshe jaǵdaılar jáne Polısııa departamentterine habarlastym. Olar kele salysymen úıdiń ıesin taýyp, shaqyrtqan bolatyn. Úıine kirip qarasaq, rasynda da, qandalany ýlaımyn dep esigin kilttep, ózderi basqa meken jaıǵa ketip qalǵan. Nege kórshilerge eskertpedińiz dese, ne úshin eskertýim kerek dep jeńistik bermedi. Alǵashynda aýany tazartý úshin balkondaǵy terezeni ashyp, bir táýlikke qaldyrǵan edi. Al keshe úıge kelsem, taǵy da terezeni jaýyp ketken, qaıtadan jaǵymsyz ıisti sezindik. Qusqymyz kelip, basymyz aınaldy, qyzdarymnyń jaǵdaıy birden nasharlaı túskenin baıqadym, úıde otyrý múmkin bolmaǵan soń jedel járdem stansasyna habarlastym. Osylaısha, balalar aýrýhanasynan bir-aq shyqtyq. Eki kún boldy, qajetti medısınalyq kómegin alyp jatyr. Dárigerlerge alǵysym sheksiz, kúndiz-túni qasymyzda. Endi kórshimniń ústinen shaǵym túsiremin, tıisti jazasyn alsyn, - deıdi ol.
Aıta ketý kerek, jyl basynan beri qandalany ýlaý kezinde kórshi páter turǵyndarynyń hımııalyq zattan ýlaný boıynsha bul - ekinshi derek. Al ótken jyly osyndaı derek boıynsha jedel járdem qyzmetine turǵyndar 13 ret telefon shalǵan. О́kinishke qaraı, saldarynan kóz jumǵandar boldy, aralarynda kámelettik jasqa tolmaǵan balalar men eresekter de bar.
