Jıyndy ashqan Memlekettik hatshy Abaıdyń 175 jyldyǵy men ál-Farabıdiń 1150 jyldyǵyn merekeleýdiń bastapqy saltanatty rásimderi Nur-Sultan men Almaty qalalarynda bastalǵanyna nazar aýdardy.
«Uly tulǵalardyń mereıtoılary ótken aıda saltanatty jaǵdaıda ashyldy. Atap aıtsaq, 21 qańtarda Nur-Sultan qalasyndaǵy «Astana Opera» teatrynda Abaıdyń 175 jyldyq mereıtoıy ózindik mazmunymen, sondaı-aq 29 qańtarda Almaty qalasyndaǵy Ál-Farabı atyndaǵy Qazaq ulttyq ýnıversıtetinde ótken jıynda ál-Farabıdiń 1150 jyldyq mereıtoıyn toılaý bastaldy», dedi Q.Kósherbaev.
Memlekettik hatshy uly oıshyldar Abaı men ál-Farabıdiń ulaǵatty muralaryn zerdeleı kele, olardyń izgilik ıdeıalarynyń túpki negizi eldiń birligi men yntymaǵymen úndesetinine taǵy da kóz jetkenine toqtaldy.
Komıssııa otyrysynda Memleket basshysy Qasym-Jomart Toqaevtyń halyqqa Joldaýy men «Abaı jáne XXI ǵasyrdaǵy Qazaqstan» atty maqalasynda jańa mindetterge, sonyń ishinde mereıtoılyq is-sharalar baǵdarlary naqty belgilenýine erekshe ekpin berdi. Memlekettik komıssııa músheleri men memlekettik organdar Abaı men ál-Farabıdiń rýhanı muralaryn nasıhattaý barysynda zııaly qaýym men otandastarymyzdyń buqaralyq aqparat quraldarynda keńinen jarııalanǵan pikirleri men usynystaryn eskerýi tıis.
«Bizdiń endigi maqsatymyz Memleket basshysy Qasym-Jomart Toqaevtyń halyqqa Joldaýynda atap ótkenindeı, ál-Farabıdiń 1150 jyldyq, Abaı Qunanbaıulynyń 175 jyldyq mereıtoılaryn, ǵulama tulǵalarymyzdyń eńbekterin halyq arasynda ysyrapshyldyqqa jol bermeı keńinen dáripteýimiz kerek. Memleket basshysynyń taıaýda jaryq kórgen «Abaı jáne XXI ǵasyrdaǵy Qazaqstan» atty maqalasynda belgilengen keleli mindetterge oraı, memlekettik komıssııa jumysynyń jaýapkershiligi odan ári arta tústi dep oılaımyn. Atalǵan maqalaǵa baspasóz betinde ún qosqan zııaly qaýym ókilderi men otandastarymyzdan Abaı murasyn nasıhattaýǵa baılanysty kóptegen usynys kelip tústi. Jurtshylyqtyń bul usynysyn barsha ortalyq jáne jergilikti atqarýshy organdar jumys barysynda qaperge alýy tıis», dedi Q.Kósherbaev.
Jıynda mereıtoıdy ótkizýdiń jalpy respýblıkalyq josparlary ońtaılandyrylyp bekitilgeni, qazirgi tańda onyń júzege asyrylyp jatqany aıtyldy. Sondaı-aq Q.Kósherbaev ótken aptada Qordaı aýdanynda oryn alǵan jaǵdaıǵa baılanysty qaıtys bolǵandardyń otbasylaryna jáne týǵan-týystaryna kóńil aıtyp, eren tirlikti, egemen birlikti, tatýlyqty tý etken halqymyzdyń yntymaq-birliginen aırylmaýyn tiledi. Osy oraıda, Abaı men Ábý Nasyr ál-Farabıdiń de urpaqqa mura etip qaldyrǵan jaýhar oılarynyń túpki negizi eldiń birligin saqtaýǵa arnalǵanyn eske salyp ótti.
«Abaı «Adamzattyń bárin súı, baýyrym dep» amanatyn aıtsa, ál-Farabı «Naǵyz baqytqa keneltetin is adamdardy bir-birine kómektesý úshin biriktiretin qala – qaıyrymdy qala. Al baqytqa jetý jolynda bir-birine qol ushyn beretin qoǵam – qaıyrymdy qoǵam» dep ósıetin qaldyrǵan», dedi Memlekettik hatshy.
Otyrysta Mádenıet jáne sport mınıstri Aqtoty Raıymqulovanyń, Bilim jáne ǵylym mınıstri Ashat Aımaǵambetovtiń, Syrtqy ister mınıstri Muhtar Tileýberdiniń, L.N.Gýmılev atyndaǵy Eýrazııa ulttyq ýnıversıtetiniń rektory Erlan Sydyqovtyń, Ál-Farabı atyndaǵy Qazaq ulttyq ýnıversıtetiniń rektory Ǵalymqaıyr Mutanovtyń esepteri tyńdaldy.
Jıyn sońynda ortalyq jáne jergilikti atqarýshy organdarǵa mereıtoılyq is-sharalardy ótkizýde ysyrapshyldyqqa jol bermeý, olardy joǵary ıdeıalyq jáne naqty qundylyqtarmen qamtamasyz etý jóninde tapsyrmalar berildi.
