Altaı Belǵazyulynyń aıtýynsha, Almaty qalasynyń ákimi Baqytjan Saǵyntaevtyń tapsyrmasymen bıylǵy jyldyń kókteminde Botanıkalyq baqty qaıta jańartýdy aıaqtaý josparlanǵan.
Búgingi kúni baq aýmaǵynda jańa kirý pavılondary, qorshaýlar salý, sýarý júıesin qurý (sýarý aryqtary) boıynsha ınjenerelik-tehnıkalyq jumystar júrgizildi. Sondaı-aq jaryqtandyrý jumystary júrgizilýde, beınebaqylaý júıeleri ornatylyp jatyr.
«Buryn Botanıkalyq baq aýmaǵyna tek Tımırıazev kóshesinen kirýge bolatyn. Endi zamanaýı kirý toptary uıymdastyryldy. Turǵyndarǵa qolaıly bolý úshin baqqa Atakentten jáne Ál-Farabı dańǵylynan kirý pavılondary uıymdastyrylady», dedi aýdan ákimi.
Sonymen qatar trotýarlardy jóndeý jumystary júrgizilýde. Joldarǵa arnaıy ekologııalyq qospa tóselýde. Fontan qurylysy aıaqtaldy. Baqtyń aýmaǵynda kishi pishindegi sálet formalary ornatylady.
«Meniń oıymsha, bizdiń Botanıkalyq baq ózgeredi, jyl saıyn kelýshiler sany artady. Qala ortalyǵynda osyndaı jasyl alqabymyzdy odan ári damytatyn bolamyz», dep bólisti aýdan basshysy.
Bostandyq aýdanynyń ákimi Atakent kórme ortalyǵynyń aldyndaǵy alańdy ózgertý boıynsha eskızdik jobalar ázirlenip jatqanyn atap ótti. Barlyq jobalar usynystar men ózgerister engizý úshin qoǵamdyq talqylaýǵa usynylady.
«Turǵyndardyń usynystary eskeriledi, ákimdik jeke sheshim qabyldamaıdy», dep qorytyndylady sózin Bostandyq aýdanynyń basshysy.
