Aımaqtar • 15 Aqpan, 2020

Jambyl oblysynyń ákimi alǵashqy jumys saparyn Qordaı aýdanynan bastady

199 retkórsetildi

Jaqynda ǵan Jambyl oblysynyń ákimi bolyp taǵaıyndalǵan Berdibek Saparbaev Qordaı aýdanyna jumys saparymen baryp, ondaǵy birqatar áleýmettik nysandardyń jumysymen tanysyp, aýyl turǵyndary tirshiliginiń qalypty jaǵdaıǵa túsý barysyn baqylady.

Jumys saparynda aımaq basshysymen birge oblys prokýrory Nurǵalym Ábdirov, UQK Departamentiniń bastyǵy Marat Irmenov jáne polısııa departamentiniń bastyǵy Janat Súleımenov  erip júrdi.

Aldymen óńir basshysy 3,5 myń turǵyny bar Qarasý aýylyndaǵy  dárigerlik ambýlatorııaǵa at basyn burdy.  25 kelýshige arnalǵan emdeý mekemesi barlyq qajetti jabdyqtarmen jabdyqtalǵan. О́tken jyly aýylda 70 sábı dúnıege kelgen desek, jergilikti turǵyndardy vaksınasııalaý jáne skrınıngtik tekserý deńgeıi 95 paıyzǵa jetken.

Atalǵan ambýlatorııa ǵımaraty 1991 jyly salynypty.  Búginde tozyǵy jetken bul nysandy oblys ákimi kúrdeli jóndeýden ótkizý  týraly usynysty qoldady. Ol úshin tıisti qujattamalar daıyn eken.

Medısınalyq qyzmetkerlermen kezdesý barysynda Berdibek Mashbekuly  dárigerlerdi bıýrokratııalyqtan aýlaq bolýǵa, turǵyndarǵa sapaly jáne ýaqytyly dárigerlik kómek kórsetýge, pasıenttermen sypaıy qarym-qatynas ornatýǵa shaqyrdy.  Aımaq basshysy barǵan kelesi nysan aýyldaǵy    "Balapan" balabaqshasy boldy.  Ondaǵy memlekettik tildegi úsh topta barlyǵy 75 bala tárbıelenýde.   

Sondaı-aq, atalǵan eldi mekendegi  № 7 orta mektepte 1033 oqýshy bilim alýda desek, ondaǵy sabaqtar qazaq jáne orys tilderinde júrgizilýde. О́tken jyly oqý ornyn 31 túlek bitirse, birinshi synypqa 134 bala qabyldanǵan. О́ńir basshysy mekteptegi tehnologııa sabaǵyna qatysyp, joǵary synyp oqýshylaryn áńgimege tartty. Muǵalimdermen kezdesý barysynda Táýelsiz Qazaqstan tarıhynda alǵash ret "Pedagog mártebesi týraly" zań qabyldanǵanyn, muǵalimderdiń jalaqysy josparly túrde artyp otyrǵanyn atap ótken B.Saparbaev  bul oraıda muǵalimderdiń de balalarǵa sapaly jáne zamanaýı bilim berýi  mindettiligin basa aıtty.

Budan soń Masanshy aýylyna barǵan oblys ákimi №13 orta mekteptiń basshylyǵyn qatań synǵa aldy.  Atalǵan bilim ordasynyń oqýshylary buǵan deıin birde-bir ret  "Altyn belgi" nemese Úzdik attestatqa ıe bola almasa, mekteptiń bir  ǵana túlegi  JOO boıynsha memlekettik grantqa qol jetkizgen. О́ńir basshysy aralaǵan kezde oqý ordasynyń synyptaryndaǵy oqýshylardyń sabaqta  tek 27 paıyzy ǵana bolǵandyǵy da ondaǵy bilim berý jumystary men tártiptiń álsizdigin baıqatsa kerek.

«Baıqap turǵanymyzdaı muǵalimder men ata-analar arasynda tyǵyz baılanys joq, oqý úderisiniń sapasyna, óskeleń urpaqty patrıotızm, mádenı-adamgershilik qundylyqtar men dástúrler rýhynda tárbıeleýge tıisti kóńil bólinbeıdi», - dep atap ótti Berdibek Mashbekuly.

О́ńir basshysy jaýapty tulǵalarǵa keler  dúısenbi kúni barlyq oqýshylar sabaqqa túgel kelýin qamtamasyz etý boıynsha naqty tapsyrma berdi.

Oblys ákimi Masanshy aýylyndaǵy aýrýhana ujymymen áńgime barysynda mindetti medısınalyq saqtandyrý júıesin engizý sharalaryna nazar aýdardy. Bul oraıda aǵymdaǵy jyldyń 1 sáýirine  deıin barlyq azamattar saqtandyrylýy kerektigine kóńil bóldi. Búginde medısınalyq uıymdar qyzmetkerleriniń  jalaqy mólsheri  artyp kele jatqanyn tilge tıek etken aımaq basshysy emdeý mekemeleriniń materıaldyq-tehnıkalyq bazasyn jaqsartýda júıeli jumystar júrgizilip jatqandyǵyn jetkizdi.

Atalǵan aýrýhanadaǵy dárigerlerdiń aıtýynsha, dári-dármekpen qamtamasyz etý, ekpe egý sharalary josparly túrde oryndalyp, "DamýMed"elektrondyq baǵdarlamasy  júıeli  jumys isteýde eken. Alaıda  olar  turǵyn úımen qamtamasyz etý máselesin aldyǵa tartty.

Sondaı-aq, oblys basshysy Qarakemer aýylyndaǵy  Ábil Núsipbaev atyndaǵy №14 orta mekteptiń,  100 oryndyq "Aısultan" balabaqshasy men "Moldaseıit" sport kesheniniń jumysymen tanysty. Pedagogtarmen kezdesýde oqýshylardyń  rýhanı tárbıesine, sabaqtastyqtyń saqtalýyna asa nazar aýdarýdyń mańyzdylyǵyn jetkizdi.

«Balalar ulttyq - mádenı dástúrlerden syrt qalmaı, rýhanı baılyqtardy jete túsinip ósýi kerek.  Aǵa býyn ókilderimen turaqty túrde kezdesýler uıymdastyrylyp, mektepter óz túlekterimen tyǵyz baılanys ornatyp otyrýy qashanda mańyzdy», - dedi Berdibek Saparbaev.     

Berdibek Mashbekulynyń aýdandaǵy jumys sapary Aýqatty aýylynda jalǵasty.  Onda tirek polısııa beketindegi qurylymdyq kúshteri  basshylarynyń qatysýymen qyzý áńgime ótti. Aıta keteıik, atalǵan  polısııa beketi birneshe jyl buryn jaqyn mańdaǵy alty aýyldyq okrýgte krımınogendik jaǵdaıdy jaqsartý úshin qurylǵan. Búginde  bekette 19 qyzmetker jumys jasaıdy.

Tártip saqshylary aýyl turǵyndarynyń qatysýymen kezdesýler men arnaıy jıyndar jıi ótkizilip turatynyn tilge tıek etti. Osy oraıda beket jumysyna qatysty máseleler de joq emes desek,  olardy sheshýmen oblystyq departament pen aýdandyq polısııa bóliminiń jańa basshylyǵy aınalysatyn boldy.

Budan soń oblys ákimi Aýqattydaǵy 100 balaǵa arnalǵan "Tilashar" jeke menshik balabaqshasynyń jumysymen tanysty.  Sonymen qatar,  aýyl meshitine qarasty keń zalda  Sortóbe, Aýqatty, Qarakemer, Masanshy, Qarasý jáne Qarasaı aýyldyq okrýgteriniń turǵyndarynan quralǵan qoǵamdyq kelisim keńesiniń otyrysyna qatysty.  Onda   jańa  qurylymnyń jumys baǵyttary men naqty is-qımyl jospary talqylandy.

Sortóbe aýylyndaǵy 450  oqýshy oqıtyn №48 orta mektep muǵalimderimen kezdesken B.Saparbaev memlekettik tildi úırenýge, ásirese oǵan orys mektepterinde kóbirek kóńil bólý kerektigine nazar aýdartty. Balalardyń bos ýaqytyn utymdy uıymdastyrýǵa kóńil bóldi.

Aýdandaǵy jumys saparyn qorytyndylaı kele aımaq basshysy adamgershilik-tárbıe baǵytyndaǵy jumysty kúsheıte túsý kerektigin aıryqsha toqtaldy.

«Biz óskeleń urpaqqa  sapaly bilim berýge tıispiz. Qordaı aýdanynda  oryn alǵan oqıǵanyń basty sebepteriniń biri jastardy tárbıeleýdegi ketken kemshilikter  desek qatelespeımiz. Sondyqtan da biz osyǵan asa nazar aýdarǵanymyz jón.  Jas qazaqstandyqtardy patrıotızm men tózimdilik rýhynda tárbıeleýdiń pármendi júıesin qurýymyz kerek, - dep qorytyndylady óz sózin Berdibek Saparbaev.

Sońǵy jańalyqtar

Sarbaz qarý-jaraqpen qashyp ketti

Qazaqstan • Búgin, 20:14

Qyzylordada esirtki tárkilendi

Aımaqtar • Búgin, 20:11

Búgingi jańalyqtar (20.02.2020)

Vıdeo • Búgin, 18:45

Ortalyqqa 10 velosıped syılady

Sport • Búgin, 17:35

Abaı murasyna arnalǵan kórme

Rýhanııat • Búgin, 15:41

Elordany kezgen elik ustaldy

Qoǵam • Búgin, 15:40

Jaǵa ustatqan jat qylyq

Aımaqtar • Búgin, 14:29

10 jyl sýbsıdııalanǵan salanyń jyry

Ekonomıka • Búgin, 14:08

Basylym basshylary - Saýytbek ABDRAHMANOV (1951)

Basylym basshylary • Búgin, 12:42

Uqsas jańalyqtar