Ekologııa, geologııa jáne tabıǵı resýrstar mınıstri M. Myrzaǵalıevtiń aıtýynsha, elimizdiń memlekettik balansynda 8 myńnan astam ken orny tirkelgen, onyń ishinde 317 kómirsýtek (munaı, gaz, kondensat), 910 qatty paıdaly qazbalar ken orny, 3 myńnan astamy keń taralǵan paıdaly qazbalar jáne 4 myńǵa jýyǵy jer asty sýlary ken orny.
«Sońǵy on jyldyqta Shyǵys Qazaqstandaǵy monoqalalarǵa jaqyn ornalasqan – Shemonaıha, Iýbıleıno-Snegırıhın, Zyrıanov iri qorǵasyn-myrysh ken oryndary tolyqtaı ıgerildi. 2025-2040 jyldarǵa taman Orlov, Maleev, Tıshın, Rıdder-Sokolnyı sekildi ken oryndarynda da paıdaly qazba qorlarynyń tolyqtaı sarqylýy kútilýde. Búgingi tańda qorlardyń ósim deńgeı koeffısıenti qatty paıdaly qazbalar boıynsha – 0,13, al kómirsýtek shıkizaty boıynsha – 0,9 (Qashaǵan ken ornyn esepke almaǵanda). Sońdyqtan da, jańa ken oryndaryn ashý jáne ony iske qosý úshin, kem degende 10-15 jyl ýaqyt ketetindigin eskere otyryp, geologııalyq barlaý jumystaryn qazirden bastap jandandyrý qajet», — dedi M. Myrzaǵalıev.
