Eki el arasyndaǵy saýda-sattyq alańyna aınalǵan «Qorǵas» shekara mańy halyqaralyq yntymaqtastyq ortalyǵynyń jumysyna indet qaýipi týraly aqparat jarııa bolǵan kúnnen bastap shekteý qoıylǵan edi. Jaǵdaı turaqtanbaıynsha ol shekteýdiń merzimi uzara bermek. Qazir bul ortalyqtyń esigine 1 naýryzǵa deıin qara qulyp ilingen.
Al ekijaqty barys-kelis negizinen Panfılov aýdanyndaǵy shekara beketterinde júretindikten, bul jaqtaǵy qaýipsizdik sharalary joǵary deńgeıge kóterildi. Jolaýshylardyń ári-beri beısaýat ótýine tyıym salynyp, aýmaqtaǵy Nur joly jáne «Altynkól» ótkizý beketterindegi jumys shektelgen. Eki bekette de sanıtarlyq-epıdemıologııa baqylaý qyzmetiniń mamandary kúsheıtilgen rejimde kezekshilik etýge kóshken.
Sondaı-aq tótenshe jaǵdaıǵa baılanysty Jarkent qalasynda 100 adamǵa arnalǵan arnaıy sanıtarlyq oqshaýlaý oryny daıyn tur. Qajettilik týa qalǵan jaǵdaıǵa arnalǵan taǵy 160 oryn qosymsha qarastyrylypty. Arnaýly oryndar barlyq sanıtar-epıdemıolog mamandarmen jáne medısınalyq jabdyqpen tolyq qamtamasyz etilgen eken.
Kúni keshe elimizdiń bas sanıtary Jandarbek Bekshın aımaqqa arnaıy kelip, Panfılov aýdanyndaǵy úsh shekaralyq ótkizý beketterinde ornalasqan medısınalyq pýnkterdiń jumysyn tekserdi. Sapar barysynda ol shekaradan ótken jolaýshylardy oqshaýlaýǵa qatysty talaptyń kúısheıgenin aıtty.
– Aqpannyń jıyrmasynan bastap Qytaıdan kelgen adamdardyń barlyǵy 14 kúnge deıin arnaıy sanıtarlyq orynǵa jiberiledi. О́ıtkeni bul vırýsty juqtyrǵan adamnan birden eshqandaı syrqat belgileri baıqalmaýy múmkin. Koronavırýstyń aǵzadaǵy jasyryn kezeńi 14 kúnnen 24 kúnge deıin sozylý faktisi anyqtalǵan. Jáne de bul azamattar 14 kún oqshaýlaý ortalyǵynda jatyp shyqqannan keıin de qosymsha on kún boıy bizdiń baqylaýymyzda bolady, – dedi Jandarbek Bekshın.
Almaty oblysy
