Qatarynan eki jyl qýańshylyq bolǵan Qostanaıda jańbyr jaýǵanda jurt qatty qýanǵan bolatyn. Biraq shildeniń aıaǵyn ala jáne tamyzda tolastamaǵan jaýyn egininiń betine qarap otyrǵan dıqandy oılandyra bastady. Sonymen qatar, sharýanyń jemshóp daıyndaýyna da qolaısyz tıdi.
Qatarynan eki jyl qýańshylyq bolǵan Qostanaıda jańbyr jaýǵanda jurt qatty qýanǵan bolatyn. Biraq shildeniń aıaǵyn ala jáne tamyzda tolastamaǵan jaýyn egininiń betine qarap otyrǵan dıqandy oılandyra bastady. Sonymen qatar, sharýanyń jemshóp daıyndaýyna da qolaısyz tıdi.
Sońǵy táýlikterde tym tolassyz quıǵan jańbyrdan eldi mekenderdi sý ala bastady. Oblysta, ásirese, apta aıaǵynda bolǵan sý tasqynynan Reseımen shekaraǵa jaqyn ózender boıynda ornalasqan Taran, Qarabalyq jáne Fedorov aýdandaryndaǵy eldi mekender zardap shekti. Qarabalyq aýdanyndaǵy Tómengi Toǵyzaq ózeni arnasynan asyp, sonyń saldarynan Prırechnoe, Nadejdınka, Mıhaılovka selolary men Toǵyzaq stansasynda barlyǵy otyzdyń syrtynda úı sýdyń astynda qaldy. Olardyń turǵyndary qaýipsiz jerge kóshirildi. Taran aýdanynda da tótenshe jaǵdaı qalyptasty. Aýdan ákimi B.О́teýlınniń sheshimimen sý basady-aý degen 96 úı kóshirilip, 240 adam qaýipsiz jerge shyǵaryldy. Taran aýdanynda ǵana sý tasqynyna qarsy 58 tehnıka jáne 220 adam jumys istedi. Demalys kúndergi arpalysta oblys ákimi Nuraly Sádýaqasovtan bastap, tıisti oryndar men vedomstvolar basshylary tótenshe jaǵdaı qalyptasqan aýdandarda boldy. Tótenshe jaǵdaılar mınıstrliginen de oblys aýdandaryndaǵy qalyptasqan jaǵdaıǵa kóńil bólinip, tikushaq jáne basqa da tehnıkalyq kómek pen adam kúshi jiberildi. Fedorov aýdanyndaǵy Zapasnoe selosynda eki páterli bir úı sýda qalyp, olardyń turǵyndary kóshirildi.
– Tótenshe jaǵdaıdyń týýyna baılanysty oblysta jedel shtab quryldy. Sý shaıǵan óńirlerdegi turǵyndardyń materıaldyq qundylyqtaryn jáne malyn saqtaý úshin qoldan kelgenniń barlyǵy jasaldy. Adamdardy saqtaý úshin aýdandarda barlyq qyzmet boıynsha kezekshilik uıymdastyryldy, – deıdi oblys ákiminiń orynbasary Bazyl Jaqypov.
Oblys óńirindegi ózender sýynyń kóterilýi Reseı jerinde jańbyrdyń tym tolassyz jaýǵanyna baılanysty bolyp otyr. Reseıden keletin sý nópirine tótep bere almaı, Chelıabi oblysyndaǵy Qartaly-Áıet ózenindegi toǵan jáne Áıet ózenindegi damby jyrylyp ketken. Osynyń saldarynan Tobyl men Áıet ózenderiniń arnasy tolyp, lyqsyp ketti. Mamandardyń aıtýynsha, Taran aýdanyndaǵy Varvarınka selosy mańynda sýdyń deńgeıi 380 santımetrge, Qarabalyq aýdanynda 26 santımetrge deıin kóterilgen.
Chelıabi oblysy gıdrometortalyǵynyń málimetinshe, Reseıdiń Qostanaımen shekaralas aımaǵynda aıyna túsetin ylǵaldyń normasy 42 mıllımetr bolýy tıis. Al sońǵy úsh táýlikte 155 mıllımetr ylǵal túsken. Reseı jaǵynda da, Qostanaı oblysynda da tamyzdyń 9-y kúni kúrt kóterilgen ózender sýynyń beti qaıtty.
Názıra JÁRIMBETOVA,
«Egemen Qazaqstan».
QOSTANAI.
