Aımaqtar • 19 Aqpan, 2020

Shaǵyn aýyldardy joısaq, shekaralyq aýmaqty qaıtemiz?

114 retkórsetildi

Jýyrda Soltústik Qazaqstan oblysynyń ákimi Qumar Aqsaqalov ákimdiktiń otyrysyn ótkizip, 2020 jyldyń qańtar aıynyń qorytyndylaryn jáne aldaǵy jumystardyń baǵdaryn anyqtady.

Ondaǵy máselelerdiń birinde oblystyń ınfraqurylymyn damytýdyń 3 jyldyq jospary jasalatyny belgili boldy. Aýyldardyń máselesi boıynsha aıtqanda Qumar Aqsaqalov: «Bolashaǵy bar aýyldardy damytý kerek. Jospar bolýy tıis. Kezek boıynsha joldar jóndelip, sý tartylýy qajet. Biz turǵyndary kóp aýyldarǵa qarjy quıamyz»,  - dedi.

Hosh... Biz qazir halyqtyń muń-muqtajyna qulaq asatyn memleket quramyz dep otyrmyz. Prezıdent Q.Toqaev óziniń alǵashqy Joldaýynda osyny aıtty. Alaıda bizdiń jergilikti bılik halyqtyń únin estigisi kelmeıtin sııaqty.

Biz jýyrda ǵana «Egemenge» maqala jazyp, durysynda aýyl úlken bolmaıtynyn, turǵyndary az dep olardy qurtatyn bolsaq, jerimiz jalańashtanyp qalatynyn shamamyz kelgenshe dáleldep jazǵan bolatynbyz. Qazir tipti 30-50 úıli aýyldar (mysal retinde «Daıyndyq», «Noǵaıbaı» aýyldaryn aıtqanbyz) úlken sharýany dóńgeletip, astyq ta, mal da ósirip otyrǵanyn aıtqanbyz. «Bolashaǵy joq» degen tujyrymnyń ózi ústirt jasalǵanyn, shaǵyn aýyldardy qurtpaı, kerisinshe, olarǵa jol tartý qajettiligin, qazaq aýyldary tabıǵı jolmen damyǵanda eshqashan úlken bolmaǵanyn jetkizgen edik... Damyǵan shet elderde de ondaı oń tájirıbe baryn aıtyp, mysalǵa Malaızııany aýyzǵa alǵanbyz. Osy maqalany kóptegen adam qoldap, Feısbýkte óz pikirlerin qosty.

Aýyldyq eldi mekenderdi dalıtyp, tym úlkeıtýdiń ózi keńestik keńkelestik saıasattyń saldarynan bolǵanyn da aıtyp, kelimsekterdi qaptatyp tókken ondaı aýyldar shynynda da tıimsiz bolyp, qazir tarap jatqanyn jazdyq. «Tabıǵı jolmen damýdy eskersek, aýyl eshqashan úlken bolmaıdy, shaǵyn aýyl adamǵa da, sharýaǵa da yńǵaıly. Al balasyn aýdan ortalyǵynan nemese qaladan oqytý, aýrýhanaǵa jetý, úlken saýda ortalyqtaryna barý, óz ónimderin ótkizý t.t. úshin aýyldyqtarǵa tek jol kerek.  Ásirese, qazirgi, ár aýlada bir-bir mashınadan dúrildep turǵan zamanda joldan basqa eshteńe kerek emes» dep qorytqan edik.

Osynyń ústine Soltústik Qazaqstan sııaqty shekaralyq oblystyń jerindegi shaǵyn aýyldardy «bolashaǵy joq» degen syltaýmen qurtatyn bolsaq, jer bos qalady. Munyń ózi eldiń qaýipsizdigin saqtaýǵa da keri áserin tıgizedi. Ejelden «bos jer jaý shaqyrady» degen támsil bar. Ony da eskerý kerek.

Alaıda bizdiń sózimizdi eleıtin bılik joq. Oblys ákimi Q.Aqsaqalovtyń sózi sol baıaǵy: «Biz turǵyny kóp aýyldarǵa qarjy quıamyz» bolyp otyr. Qazir turǵyndary kóp aýyldy qaıdan tabasyń. Barlyq mekender de turǵyndarynan eselep aıyrylyp qalǵan. Halyqtyń muń-muqtajyn estıtin Úkimet bolsa tym bolmasa aıtylǵan máselelerge kóńil aýdarar edi. Alaıda bizde estıtin bılik joq pa dep oılaımyz. Mundaı isterdi kerisinshe, eshteńeni estimeıtin kereń memlekettiń qylyǵy ma dep qalasyń...

 

Soltústik Qazaqstan oblysy

Sońǵy jańalyqtar

Taraz qalasy karantınge jabylady

Aımaqtar • Búgin, 21:48

Asqar Altaı. VIRÝS-MÝTANT (Novella)

Ádebıet • Búgin, 19:07

Tankerlerdiń qaıda baratyny belgisiz

Ekonomıka • Búgin, 18:32

Ár teńge úshin esep berýge daıynbyz

Ekonomıka • Búgin, 17:01

Esik nege «tesik»?

Qoǵam • Búgin, 15:25

Betperde kıgen kóktem - 5

Qoǵam • Búgin, 15:10

Qyzylorda oblysy: Taǵy 3 adam vırýs juqtyrdy

Koronavırýs • Búgin, 13:31

COVID-19 vırýsy mysyqtan tabyldy

Álem • Búgin, 12:03

Syrdarııaǵa jylanbalyq qaıdan kelgen?

Aımaqtar • Búgin, 11:32

Koronavırýs hám kóshe sýretteri

Álem • Búgin, 10:51

Uqsas jańalyqtar