«Syrdarııa ózeniniń arnasyn retteý jáne Aral teńiziniń soltústik bóligin saqtaý» jobasynyń ekinshi kezeńi aıasynda Qyzylorda sý torabyn qaıta jańǵyrtý, Qarmaqshy, Qazaly aýdandaryndaǵy qorǵanys bógetterin nyǵaıtý, Jalaǵash aýdanynda Turymbet jáne Qorǵansha ýchaskelerinde ózen arnasyn túzetý jumystary bastalady, dedi oblys ákimi.
Syrdarııa ózeniniń Qyzylorda qalasy tusyndaǵy bóliginde arna tazalaýǵa da qarjy bólinetin boldy. Bul joba iske asqanda ózen arnasynyń 9 shaqyrymǵa jýyq tusy tazalanady dep josparlanýda.
Oblys basshylyǵy Úkimetke Qaraózek (sý jınaý kólemi – 1,5 mlrd tekshemetr) jáne Kúmisketken (sý jınaý kólemi – 600 mln tekshemetr) sý qoımalaryn salýdy usynyp otyr. Bul jyl saıyn Úlken Aral teńizine ketip jatqan 2 mlrd tekshe metrden astam sýdy oblys aýmaǵynda saqtap, egindi sýlandyrýǵa múmkindik beredi.
