Tikeleı efır barysynda baǵdarlamaǵa qatysqan Transplanttaýdy úılestirý jónindegi respýblıkalyq ortalyǵy dırektorynyń mindetin atqarýshy Ádil Jumaǵalıev tikeleı efırde qazir qyzý talqyǵa túsken donorlyq týraly túsindirdi.
«On jyldam asty, 2009 jyldan beri bizdiń áriptesterimiz birinshi kodekske saı jumys istep jatyr. Qazir qoǵamda keń talqylanǵan máıittik donorlyqqa qatysty bap jańa norma emes. Kelisim prezýmpsııasy 2009 jyly engizilgen. Biz transplanttaý boıynsha qazirgi tańda álemde kósh bastap turǵan ıspandyq modelmen jumys istep jatyrmyz», - dedi Ádil Jumaǵalıev.
Onyń aıtýynsha, osy kúnge deıin ortalyq dárigerleri 95 máıittik donor anyqtap, árqaısysynda týystarynan ruqsat alǵan.
«Dárigerler ózderi máıittiń týystarynan ruqsat alyp júrdi. Degenmen, birinshi kodekste dál osy jer kórsetilmegen. Iаǵnı, qoldanystaǵy kodekste týystarynyń ruqsatyn alý týraly aıtylmaǵan. Al qazir engizilgen ózgeriske saı, jańa Kodeks boıynsha aı adam qaıtys bolǵan soń onyń tiri kezinde donorlyqqa kelisken nemese bas tartqany týraly eshqandaı aqparat joq bolsa, týystarynan ruqsat suraımyz», - dedi ol.
Al baǵdarlamaǵa qatysqan qoǵam qaıratkeri Murat Ábenov osy kúnge deıin adam donorlyqqa qarsy bola alǵanymen, ony tirkeıtin jerdiń, resmı málimdeıtin orynnyń bolmaǵanyn aıtty.
«Sonda men baryp donorlyqqa aǵzany berýge qarsymyn dep aıtaıyn desem, baratyn jer joq. Iаǵnı, men qarsy bolmasam, onda avtomatty túrde kelisim bergen bolyp sanalamyn», dep narazylyq bildirdi.
Aıta ketý kerek, búgingi tańda álem boıynsha bir mıllıon adam donorlarǵa muqtaj bolyp otyr.
