Pılot sheńberinde ortalyq jáne jergilikti atqarýshy organdar ádisnamalyq jáne tehnıkalyq qoldaýmen qamtamasyz etildi.
Memlekettik satyp alýdy ortalyqtandyrýdyń tıimdilikteri mynadaı:
- bir lotqa irilendirý esebinen bıýdjet qarajatyn únemdeý;
- memlekettik satyp alý rásimderin ótkizýge jumsalatyn ákimshilik shyǵystardy qysqartý;
- bıýdjettik uıymdardy ózine qatyssyz fýnksııalardan bosatý;
- kásibılendirý jáne sonyń nátıjesinde satyp alý sapasynyń artýy;
- satyp alý qyzmetin úzdik basqarý, óıtkeni satyp alýshylar fýnksııalarynyń ákimshilik qaıtalanýy qysqartylady;
- satyp alýshylardyń qyzmetin baqylaý men qadaǵalaýdy ońtaılandyrý esebinen sybaılas jemqorlyq qaterlerin azaıtý.
Memlekettik satyp alýlardy sıfrlandyrý
Memlekettik satyp alýlardaǵy ózekti máselelerdiń biri – onyń ashyqtyǵyn arttyrý.
2009 jylǵa deıin Qazaqstanda memlekettik satyp alýlar qaǵaz túrinde júrgizildi: habarlandyrýlar gazetterde jarııalandy, ótinimder ashyq hattarǵa salynyp berildi, tapsyrys berýshiler ótinimderdi óz betinshe qarap, qorytyndy shyǵardy. Mundaı jaǵdaılarda memlekettik satyp alýlardaǵy básekelestik te tómen boldy. Memlekettik satyp alýǵa qatysýshylardyń ortasha sany nebári 1-2 kompanııany qurady. Kóp jaǵdaılarda berilgen ótinimder sanynyń 2-den az bolýyna baılanysty satyp alý ótkizildi dep sanalmady.
Satyp alýdyń mundaı formatynda árbir tapsyrys berýshiniń ózimen jumys isteıtin jetkizýshiler pýlynyń qurylýyna ákeldi. Osyǵan baılanysty, sol kezdegi tapsyrys berýshilerde satyp alynatyn taýarlardyń, jumystardyń, kórsetiletin qyzmetterdiń sapasyna qatysty eshqandaı másele týyndaǵan joq.
2019 jyldyń 27 jeltoqsanynda memlekettik satyp alýlardyń tolyq ashyqtyǵyn qamtamasyz etý maqsatynda memlekettik satyp alýdy júzege asyrý qaǵıdalaryna ózgerister engizildi. Memlekettik satyp alýlar josparlaýdan bastap, tólemmen aıaqtalatyn rásimderine deıin 100% elektrondyq formatqa aýystyryldy.
Memlekettik satyp alýlar týraly barlyq málimetter men olardyń qujattamasy, onyń ishinde tehnıkalyq erekshelikteri týraly derekter ashyq ári qoljetimdi. Mundaı málimetterdi veb-portalǵa tirkelmeı-aq kez kelgen adam kóre alady.
Memlekettik satyp alýlar veb-portalynyń memlekettik organdardyń aqparattyq júıelerimen jan-jaqty kiriktirilýi bıznes úderisterin tolyǵymen avtomattandyrýǵa múmkindik berdi.
«Qazaqstan Respýblıkasynyń keıbir zańnamalyq aktilerine memlekettik satyp alýlar jáne kvazımemlekettik sektor nysandaryn satyp alý máseleleri jóninde ózgerister engizý týraly» zańnamaǵa engizilgen jańa túzetýlerge sáıkes, 2019 jylǵy 1 qańtardan bastap barlyq memlekettik satyp alýlar osy veb-portal aqyly túrde júzege asyrylady. Bul rette veb-portaldy bir jyl boıy paıdalaný tarıfi satyp alýdyń shekti somasynyń kólemine qaraı engizildi. Máselen, jumystar men qyzmetter boıynsha bir kózden satyp alýdyń shekti somasy 1 mln teńgege deıin bolsa, AEK-ke shaqqandaǵy veb-portaldy paıdalaný tarıfi bir jyl merzimge 1 AEK-ti (2 651 teńge) quraıtyn bolady. Sol sııaqty (2020 jylǵa tarıfter):
10 mln teńgege deıin bolsa, jylyna – 10 AEK (26 510 teńge);
100 mln teńgege deıin bolsa, jylyna – 20 AEK (53 020 teńge);
1 mlrd teńgege deıin bolsa, jylyna – 60 AEK (159 060 teńge);
shekteýsiz bolsa, jylyna – 122 AEK (323 422 teńge).
Memlekettik satyp alýlar veb-portalyn áleýetti jetkizýshiler úshin aqyly etý portal jumysyn qamtamasyz etýge baǵyttalatyn bıýdjet shyǵyndaryn alyp tastaýǵa múmkindik beredi. Sondaı-aq veb-portaldy paıdalanýshylar úshin joǵary tehnologııalar engizilip, qosymsha servıster qurylady (sms-habarlamalar jiberý, sall-ortalyqtyń táýlik boıy jumys isteýi jáne t. b.). Iаǵnı, buǵan deıin veb-portaldyń qarjylyq múmkindikteriniń shekteýli bolýy joǵary tehnologııalardy engizýge jáne ony paıdalanýshylarǵa qosymsha qyzmetterdi kórsetýge múmkindik bermedi.
Eń mańyzdy artyqshylyǵy, veb-portaldyń aqyly bolýy josyqsyz shaǵymdanýdy, solaısha, memlekettik satyp alý rásimin buzýdan zańsyz paıda tabýdy kózdeıtin, satyp alýǵa nıetsiz qatysýshylardan «súzgi» retinde qyzmet etetin bolady.
Memlekettik satyp alýlar veb-portaly áleýetti jetkizýshiler úshin tıisti kelisimshart jasasqannan keıin jáne kórsetiletin qyzmetke aqy tólegen soń qoljetimdi bolady.
Búginde memlekettik satyp alýlardyń aıqyndyǵy men ashyqtyǵyn qamtamasyz etý mindeti tolyq kólemde oryndaldy. Memlekettik satyp alýdy josparlaýdan bastap tólem jasaýǵa deıingi barlyq rásimder elektrondyq formatqa aýystyryldy. Bul básekelestikti arttyrýǵa múmkindik berdi, satyp alýlar ashyq jáne barlyǵy úshin qoljetimdi boldy. Qazir úıde kompıýter aldynda otyrǵan kez kelgen adam, meken-jaıyna qaramastan, memlekettik satyp alýǵa qatysa alady. Bul úshin elektrondyq sıfrlyq qoltańbasynyń bolýy jetkilikti.
