Aımaqtar • 23 Aqpan, 2020

Semeıde stýdentter sóıleý mádenıetin talqylady

82 retkórsetildi

Shákárim atyndaǵy memlekettik ýnıversıtettiń  Semeı jobalyq keńsesinde «Sóıleý mádenıeti – ustazdyń etıkalyq mádenıetiniń bir bólshegi» taqyrybynda  ashyq pikir alańy uıymdastyryldy.

Atalmysh ýnıversıtettegi jaratylystaný jáne matematıka fakýltetiniń stýdentterimen kezdesken Semeı qalalyq mádenıet jáne tilderdi damytý bóliminiń bas mamany Anar Qýangalıeva men  Semeı jobalyq keńsesiniń  qyzmetkeri Shyryn Qaýanovalar sóıleý mádenıetin damytý, tulǵanyń sóıleý etıkasyn qalyptastyrý týraly mańyzdy áńgime qozǵap, ómirdegi óz tájirıbelerimen bólisti.  Erkin formattaǵy pikir alańynda stýdentter lektorlardyń dárisine qyzyǵýshylyq tanytyp, ártúrli saýaldar qoıyp, óz pikirlerin de bildirdi. 

-Sóıleý – jeke adamnyń ǵana qajeti emes, qoǵamdyq sıpaty mol qasıet ekeni belgili. Ásirese, shákirt tárbıeleıtin ustaz bolashaǵymyzdyń aınasy ekenin eskere otyryp, jastardyń durys sóıleý mádenıetin damytýdy búgingi sharamen ushtastyrdyq,- deıdi fakýltettiń aǵa kýratory Aıgúl Kóbegenova.

-Biz kúndelikti ómirde ártúrli adamdarmen qarym-qatynas ornatyp, túrli sheshimder qabyldaımyz,-dedi Shyryn Qaýanova,-syrttaı qaraǵanda adamdardan aıtarlyqtaı ózgeshelikter de baıqamaımyz. Sebebi, kúndelikti kıgen kıimi, keskin kelbeti onyń syrtqy álemin ǵana tanytady. Al eger, tildese bastasaq, ol adamnyń kim ekenin, ómirde qandaı ekenin sóılegeninen birden baıqaýǵa bolady.  Meniń oıymsha, sóıleý bul- ár adamnyń jeke kommýnıkasııalyq qujaty. Sóıleý mádenıetin bilý-óner.  Til mádenıetine barar joldyń bastaýy  da – durys sóıleı bilý. Qoǵamda ásirese, jastar arasynda sóıleý daǵdysynyń daǵdarysqa ushyrap bara jatqanyn jıi baıqaýǵa bolady.

Ashyq pikir alańynda bolashaq pedagogtarmen kóptegen máseleler qozǵaldy. Tildi damytýda úzdiksiz izdenip, qajymaı-talmaı  kóp oqý arqyly sóıleý etıkasyn qalyptastyrý kerektigi de aıtyldy.  Sóıleý daǵdysyn qalyptastyrýǵa baılanysty arnaıy jattyǵýlar, qyzyqty kitaptar usynyldy.

Sońǵy jańalyqtar

Shymkent: Sıfrly otbasynyń bir kúni

Ońtústik Qazaqstan • Keshe

Uqsas jańalyqtar